Leartiad Lekaj (Laert Keka), 41 vjeç, u ekzekutua mbrëmjen e së shtunës me breshëri kallashnikovi, nga persona ende të paidentifikuar nga policia. Kjo e fundit ka shoqëruar disa persona lidhur me ngjarjen, por pa mundur deri paraditen e së dielës, të hedhë dritë mbi ngjarjen, edhe pse janë ngritur dyshime se ekzekutimi i Lekajt mund të ketë ndodhur për motive hasmërie.
Trupi i viktimës ka qëndruar për disa orë në morg, ndërsa familjarët janë ankuar për vonesa të shkaktuara nga mungesa e mjekut ligjor.
“Po presim mjekoligjorin, kemi që në orën 22:00 këtu, asnjë përgjigje, vijnë e ikin. Do vij tani, do vij pastaj e nuk po vijnë. Na thonë që do vij nga çasti në çast, na gënjejnë. Kërkesa jonë është të vijë sa më shpejt mjekoligjori, brenda 12 orëve duhet të iki trupi në shtëpi. Kaq! Nuk e dimë nëse institucioni ka mjek ligjor, na kanë thënë do vijë nga Fieri.
Tani ne jemi në dispozicion të shkojmë ta marrim mjekoligjorin vet nëse shteti nuk e disponon, shkojmë ne e marrim, por brenda 12 orëve ne duhet ta marrim trupin ta çojmë në shtëpi. Kaq është kërkesa jonë,” u shpreh një nga familjarët e Lekajt, raporton Euronews Albania.
Njoftimi nga Policia
Rreth orës 21:50, në lagjen “28-Nëntori”, në rrethana ende të paqarta, është vrarë me armë zjarri shtetasi L. K., 41 vjeç.
Nga kontrolli i zonës, në aksin rrugor “Kotë- Sevaster”, shërbimet e Policisë kanë konstatuar një automjet tip “Audi”, duke u djegur.
Janë ngritur menjëherë pika kontrolli në hyrje/daljet e qytetit të Vlorës dhe në akset “Vlorë-Fier”, “Vlorë-Tepelenë” dhe “Vlorë-Himarë”.
Gjithashtu, shërbimet e Policisë vijojnë krehjen e zonës, me qëllim lokalizimin dhe kapjen e autorëve.
Grupi hetimor ndodhet në vendngjarje dhe në drejtimin e prokurorit, po punon për sqarimin e rrethanave të ngjarjes, si dhe për fiksimin e çdo prove që do t’i shërbejë hetimit, me qëllim identifikimin dhe kapjen e autorëve.
Discussion about this post