Atletico e Madridit është mposhtur pasditen e sotme, nga ekipi i Elches, në ndeshjen e javës së 34-rt të Kampionatit Spanjoll.
Takimi i luajtur në stadiumin Martinez-Valero, pritej të ishte i lehtë për djemtë e Diego Simeone por, skuadra nga Komuniteti Valencian tregoi se ndeshjet nuk fitohen në letër.
Vendasit, të cilët luajtën thjesht për statistika, duke parë që kanë rënë tashmë nga kategoria, treguan se kishin dëshirë për të fituar, falë mbrojtjes së mirë dhe kundërsulmeve të rrezikshme.
Në minutën e 41’, Elche “goditi saktë”, duke zhbllokuar rezultatin me anë të Fidel.
Me epërsinë surprizë të vendasve u mbyll pjesa e parë e takimit. Në pjesën e dytë, klubi i dytë i kryeqytetit spanjoll, hyri në fushë me objektiv për të kthyer rezultatin por nga fillimi i fraksionit të dytë të lojës e deri në fund, Elche mbijetoi duke fituar 1-0 përballë një ekipi më të fortë, në letër.
Kjo humbje i bëri dëm Atleticos, duke parë që bardhekuqtë, zbresin në vendin e tretë, pas Realit të Madridit. /m.b /gijotina.com
Discussion about this post