Policia e Durrësit ka vënë në pranga një 41-vjeçar pasi akuzohet si autor i pesë vjedhjeve në qytetin bregdetar. Sipas njoftimit, është arrestuar P. P., 41 vjeç, banues në lagjen nr. 2, Durrës.
Ky person u kap në flagrancë gjatë operacionit, në tentativë për të vjedhur në një banesë, në lagjen nr. 2, Durrës. Ai akuzohet si autor i pesë vjedhjeve, nga banesa e të cilave ka marrë një biçikletë, telefon, dhe një sasi lekësh.
Në bashkëpunim me Prokurorinë vijon puna për zbardhjen dhe dokumentimin edhe të rasteve të tjera të vjedhjeve të ndodhura më parë, që dyshohet se janë kryer nga ky shtetas.
Materialet i kaluan Prokurorisë së Rrethit Gjyqësor Durrës, për veprime të mëtejshme, për veprën penale “Vjedhja” e kryer më shumë se një herë.
Discussion about this post