Projektimet për një aeroplan të ri me energji hidrogjeni mund të fillojnë një epokë të re të fluturimit hipersonik që do të shkurtojë kohën e udhëtimit rreth globit për disa orë.
Aeroplani më i fundit që arriti një sukses të tillë ishte Concorde, projektim supersonik i inxhinierisë anglo-franceze.
Në kulmin e tij, aeroplani kaloi Atlantikun në një kohë rekord për rreth 3.5 orë, duke fluturuar me një shpejtësi prej mbi 2,100 kilometrave në orë.
Por, një start-up zviceran dëshiron të zvogëlojë kohën aktuale të udhëtimit prej Parisit në New York nga 8 orë në vetëm një orë e gjysmë, me aeroplanin e tij hipersonik me pasagjerë që fuqizohet me energji hidrogjeni.
Derisa kompanitë e tjera po angazhohen sërish me fluturimin supersonik, Destinus synon të ndërtojë aeroplanin e parë komercial me energji hidrogjeni që mund të udhëtojë me pesë herë shpejtësinë e zërit dhe në lartësi mbi 33 kilometra.
Kompania ka testuar prototipin e aeroplanit të saj për dy vjetët e fundit, duke njoftuar fluturime të suksesshme testuese të prototipit të saj të dytë ‘Eiger’ në fund të vitit 2022.
“Prototipet duken ndryshe nga produkti përfundimtar, sepse produkti përfundimtar ka teknologji shumë të avancuar të shtytjes”, tha Bart Van Hove, kreu i studimeve të avancuara të Destinus, gjatë një panairi në Paris.
Me këto shpejtësi, linjat ajrore komerciale të ardhshme do të jenë në gjendje të fluturojnë midis Parisit dhe New Yorkut në rreth 90 minuta.
Nga Frankfurti në Sidnei për 4 orë e 15 minuta
Aeroplani gjithashtu hap mundësinë për të shkurtuar udhëtimet nëpër botë.
Fluturimi nëpër botë nga Evropa në një destinacion të tillë si Australia kërkon aktualisht rreth 20 orë me një aeroplan të rregullt pasagjerësh.
Destinus pretendon se teknologjia e tij do të bëjë që një fluturim nga Frankfurti në Sidnei të zgjasë vetëm 4 orë 15 minuta në krahasim me 20 orë, ndërsa një fluturim nga Frankfurti në Shanghai do të zgjaste 2 orë 45 minuta, tetë orë më pak se udhëtimi aktualisht.
Discussion about this post