Mëngjesin e sotëm rreth orës 09:00, një avion i dyshimtë u rrëzua në Vermosh, por ajo ç’ka mbetet enigmë është se në kontrollet e bëra nga policia nuk u gjet asgjë. Sipas burimeve, dyshohet se piloti bashkë me një tjetër person u larguan nga vendi i ngjarjes me një automjet pa targa. Kjo shton dyshimet se ka pasur të tjerë persona të përfshirë në ngjarje, por sërish nuk dihet funksioni i tyre. Policia deri më tani nuk ka mundur dot, të bjerë në gjurmët e personave të cilët braktisën mjetin fluturues.
Burime nga grupi hetimor bëjnë me dije se deri më tani nuk dihet se cili ka qenë destinacioni i avionit, por dyshohet të jetë rrëzuar në Vermosh për shkak të peshës, ku më pas nuk ka mundur dot të ngrihet si pasojë e një defekti motorik. Këto detaje shtyjnë grupin hetimor të dyshojë se mjeti fluturues ka qenë i ngarkuar, por nuk dihet se çfarë ka pasur brenda, megjithëse dyshimet janë për lëndë narkotike. Ndër të tjera, koha e shkurtër e cila iu desh dy personave të largohen nga vendi i ngjarjes, shton edhe më tepër dyshimet e policisë se ata e kanë njohur zonën, kanë persona të njohur aty e nuk është hera e parë që gjenden në Vermosh.
Në lidhje me origjinën e pilotit të avionit, dyshohet të jetë nga Bosnja, detaj ky i cili pritet të zbardhet më tej edhe nga policia.
