Avokati i Dakos: Akuzohet për shpërdorim detyre, një kallëzim e ka bërë Xhaferri

Avokati i Vangjush Dakos u shpreh mbrëmjen e sotme se ndaj klientit të tij rëndon akuza e shpërdorimit të detyrës në dy raste.

Avokati tha se kallëzimi i parë është bërë nga një grup banorësh në Durrës lidhur me një pallat, ndërsa kallëzimi i dytë është bërë nga Ferdinand Xhaferri, para zgjedhjeve të 2021. Avokati tha se pallati për të cilin thuhet është me leje dhe vendimi për lejen është kolegjial, i marrë nga Bashkia e Durrësit.

Avokati e cilësoi si një vendim në trysni atë të marrë ndaj Dakos nga SPAK.

“Masa e sigurisë arrest me burg nuk ka qenë aspak e nevojshme”, tha avokati i Dakos.

Ai sqaroi se Dako është vetëdorëzuar në Drejtorinë e Policisë së Tiranës, pasi ka qenë në kryeqytet kur ka parë nga mediat se ndaj tij ka një masë sigurie.

“Dako ka qenë në kontakt me SPAK, ka dhënë sqarimet e nevojshme lidhur me çështjet”, tha avokati.

Sipas tij, Dako s’ka problem shëndetësore, përveç gjendjes emocionale, që kuptohet janë normale.