Avokati i Popullit ka kryer sot një vizitë në Spitalin Klinik “Stefan Gjoni” në Krujë, për monitorimin e gjendjes së pacientëve që kanë marrë shërbimin atje, pasi përfunduan në spital me simptoma të dyshuara nga helmimi prej ujit të pijshëm.
Sipas raportit, nga data 24 tetor 2021 e deri më 27 tetor në këtë spital kishin marrë shërbimin rreth 541 pacientë.
“Nga takimi që ka zhvilluar me drejtoreshën e spitalit, Yllka Sheta, të gjithë personave ju është dhënë dhe po u jepet shërbimi i duhur shëndetësor. Sikurse u referua prej drejtuesve të Spitalit, prej datës 24 Tetor 2021 e deri më 27 Tetor në këtë spital kishin marrë shërbimin rreth 541 pacientë sipas datave të mëposhtme:
42 pacientë më datë 24 Tetor;
206 pacientë më datë 25 Tetor;
236 pacientë më datë 26 Tetor dhe
57 pacientë më datë 27 Tetor.
Nga informacionet e marra prej personave që ishin duke u trajtuar në mënyrë ambulatore na u bë me dije se simptomat e tyre përkonin me dhembje koke, dhembje barku, të përziera, si dhe në disa raste edhe temperaturë. Qytetarët e sëmurë janë të bindur se kjo situatë u është shkaktuar nga konsumimi i ujit.
Qytetarët kanë marrë shërbimin e nevojshëm, janë vizituar, janë konsultuar dhe gjithashtu kanë marrë shërbime sipas protokolleve të mjekimit. U konfirmua se edhe pacientë të tjerë të cilët janë duke u trajtuar pranë shërbimit të Urgjencës dhe gjithashtu në disa pavionë. Sipas drejtuesve, spitali ka punuar me kapacitet të plotë në të tre turnet dhe po ashtu sipas tyre, medikamentet nuk kanë munguar në asnjë moment.’- njofton Avokati i Popullit” – thuhet në raportin e Avokatit të Popullit.
