Avokati Rezart Kthupi, në një intervistë për Ora News, ka deklaruar se Presidenti i Republikës ka dy mundësi ligjore për të vendosur mbi shpalljen e datës së zgjedhjeve për Bashkinë e Tiranës, pas vendimit për shkarkimin e kryebashkiakut Erion Veliaj.
Sipas Kthupit, Qeveria ka ndjekur procedurën e duhur duke njoftuar Presidentin për vakancën në drejtimin e bashkisë, një veprim që ai e konsideroi si “nga të rrallat herë që Qeveria zbaton ligjin siç duhet”.
“Çështja tani mbetet në dorën e Presidentit të Republikës,” tha Kthupi. “Ai duhet t’i drejtohet zyrtarisht Gjykatës Kushtetuese për të verifikuar nëse çështja është regjistruar pranë saj.”
Nëse Gjykata Kushtetuese konfirmon se ka një çështje të regjistruar që lidhet me vendimin për shkarkimin e Veliajt, atëherë, sipas Kthupit, Presidenti ka dy mënyra për të vepruar:
“Presidenti mund të vendosë të mos shpallë datën e zgjedhjeve për sa kohë që çështja është në shqyrtim pranë Gjykatës Kushtetuese. Ose, përkundrazi, mund të interpretojë se për sa kohë nuk ka një vendim për pezullim nga gjykata, procesi i shpalljes së zgjedhjeve duhet të vazhdojë,” shpjegoi ai.
Debati rreth zgjedhjeve në Bashkinë e Tiranës vjen pas vendimit të Këshillit të Ministrave për të shkarkuar Erion Veliajn nga posti i kryebashkiakut, një vendim që është kundërshtuar politikisht dhe pritet të trajtohet nga Gjykata Kushtetuese.
Discussion about this post