Komisioneri i Mekanizmit Kombëtar për Parandalimin e Torturës pranë Avokatit të Popullit ka publikuar një raport paraprak monitorimi për shoqërimin e protestuesve në komisariate pas protestës së djeshme. Sipas raportit, rreth 50 persona u shoqëruan në komisariate, mes tyre 18 të mitur.
Në raport evidentohen pretendime për dhunë fizike dhe psikologjike nga punonjësit e Policisë së Shtetit gjatë ndalimit dhe shoqërimit. Të shoqëruarit kanë raportuar përdorimin e sprajit me piper dhe gazit lotsjellës, goditje me bombola gazi, si dhe raste të tërheqjes zvarrë.
Komisioneri thekson se çdo rast dhune ndaj një të mituri gjatë shoqërimit përbën shkelje të rëndë dhe se personat përgjegjës duhet të mbajnë përgjegjësi.
Sipas raportit, një prej ankuesve pretendoi se ishte goditur në një zyrë të Komisariatit nr. 4, ku nuk ka kamera sigurie. Gjithashtu, disa të mitur dhe të rritur deklaruan se punonjësit e policisë u kishin kërkuar të zhbllokonin telefonat celularë dhe të lejonin kontrollin e të dhënave personale, pa vendim gjykate. Disa prej tyre pretenduan se këto kërkesa ishin bërë edhe në mungesë të një akuze nga prokuroria.
Në raport përmenden edhe pretendime se disa persona janë shoqëruar në komisariat pa një shkak të ligjshëm, pasi, sipas deklarimeve të tyre, ishin kalimtarë të rastit dhe nuk kishin lidhje me protestën.
Gjatë monitorimit në komisariatet nr. 2 dhe nr. 4, janë evidentuar punonjës policie pa numra identifikues, si dhe mangësi në të dhënat e regjistrave të shoqërimit.
Ndërkohë, në Bllokun e Sigurisë janë shoqëruar 109 persona, mes tyre një i mitur dhe katër gra. Raporti evidenton mbingarkesë të ambienteve dhe mungesa të shtretërve, ujit, ngrohjes dhe kujdesit mjekësor.
Për këtë situatë, Avokati i Popullit i kërkon Ministrisë së Brendshme të ndërhyjë urgjentisht për të ulur numrin e personave të mbajtur në Bllokun e Sigurisë dhe për të mundësuar transferimin e tyre në ambiente të tjera që respektojnë kapacitetet ligjore.
Discussion about this post