“Gledis Nano s’e merrte në dorëzim…”, avokatja e Popullit flet për gjendjen e komisariateve

Avokatja e Popullit Erinda Ballanca e pranishme sot në Komisionin e Ligjeve u ndal gjerë e gjatë tek gjendja e qelive të paraburgimit në komisariatet e Tiranës. Ballanca tha se gjendja e tyre është katostrofike ndërsa theksoi se i duket e padrejtë fakti që brenda tyre janë futur edhe qytetarë që kanë protestuar për masat anti-Covid pa patur asnjë kusht brenda tyre.
Avokatja e popullit tha se është katastrofike që gjatë inspektimeve qelitë janë gjetur në kushte të tilla dhe se duhet një investim i ri. Ndërkaq, Ballanca tha se nisur nga problematikat e shumta, vetë Gledis Nano ka hezituar ta marrë në dorëzim objektin.
“Sa i përket gjendjes në komisariatet e Tiranës, në mënyrë të veçantë është katastrofike, tërësisht në kundërshtim me standardet për qëndrimin e personave të privuar nga liria. Kemi pasur raport për dhoma të mbyllura, dhe kur ne kemi shkuar për inspektim i kemi gjetur të hapura.

Futeshin brenda në komisariate, persona me zero kushte, për shkak se kishin protestuar në shkelje të rregullave anticovid. Ndërkohë në ato komisariate nuk ka pasur asnjë kusht, prej 3 vitesh në Tiranë po ndërtohet një bllok i dhomave të sigurisë, me një kapacitet tjetër, dhe me kushte të tjera.

Dhe aty kemi një problem, sepse është bërë një investim pa menduar, ky boks i ri nuk ka elementë sigurie në përputhje me ligjin, me të drejtë drejtori i policisë, kur ka shkuar për të marrë në dorëzim objektin, ka refuzuar, sepse nuk ka elementë të sigurisë. Kemi 7 muaj që qytetarët jetojnë në kushte skandaloze, për shkak se personi që duhet të kishte parë elementët e sigurisë, nuk e ka bërë detyrën e tij.
Kemi kërkuar ndjekje penale, lekët hidhen, dhe investimi në rastin konkret nuk po çon aty ku duhet të çonte, është një problem jo i vogël për Tiranën. Diku do të shkojnë këta njerëz, në rastin e Kamzës psh, drejtori i komisariatit ka thënë ‘ku ti çoj?, jam i detyruar’. Pra në fund të ditës problemi thelbësor që mbetet është se investimi që u bë…Unë kam bërë takim dhe me zotin Nano për këtë çështje”, u shpreh Ballanca.