Avokatja: Ja tre arsyet se përse ndahen më shumë shqiptarët

Mëngjesin e sotëm në “Koha për t’u zgjuar” ishte e ftuar avokatja Enea Biçaku, e cila është ndalur tek zgjidhjet e martesës dhe problematikat me të cilat përballen qytetarët në këtë proces.

Ajo u shpreh se numri i divorceve ka pësuar rritje progresive ndërsa ndër shkaqet kryesore se përse ndahen shqiptarët, ka renditur dhunën, emigracionin dhe tradhtinë bashkëshortore.

Sa i përket ndarjes së pasurisë, avokatja theksoi rëndësinë e një kontrate paramartesore, ndërsa shtoi se në mungesë të saj ndarja për pasuritë e fituara pas martese ndahen në mënyrë të barabartë mes bashkëshortësh.

“Çështjet e divorceve kanë ardhur në rritje si shkak i dhunës në familje apo emigracionit

Shkak tjetër i rëndësishëm është edhe tradhtia bashkëshortore që vitet e fundit ka pësuar rritje.

Problematikët më të mëdha është mungesa e kontratave paramartesore, që nuk është ende pjesë e kulturës shqiptare.

Është edhe çështje tabush

Nëse nuk kemi një kontratë paramartësore hyn në punë bashkësia ligjore, sipas të cilës çdo pasuri e fituar pas martese do të ndahet në mënyrë të barabartë mes bashkëshortësh.

Duhet të theksojmë faktin që ka dy raste kur pasuria nuk ndahet mes tyre, dhe këto janë kur pasuria fitohet me trashëgimi apo akt dhurimi, këto janë pasuri vetjake dhe nuk ndahen”, tha Biçaku.

Avokatja ka sqaruar edhe rastet kur çiftet të cilat kanë lidhur martesë në Shqipëri, emigrojnë dhe e zgjidhin martesën në një vend tjetër.

Ajo u shpreh se në këtë rast njohja e zgjidhjes së martesës bëhet nga Gjykata e Apelit të juridiksionit të Përgjithshëm në Tiranë.