Djali i një prej figurave historike të Partisë Demokratike, Azem Hajdari, i cili mban të njëjtin emër, ka folur për ambicien e tij për fushën e politikës. Gjatë një interviste ditën e sotme ai ka treguar se aktualisht ndjek studimet në degën Drejtësi, Bachelor. Hajdari ka thënë se e sheh si mundësi që në të ardhmen t’u futet politikës, por po pret momentin e duhur.
“Unë jam shumë besimtar në zot, dhe jam me idenë që njeriu duhet të bëj sa më shumë mirë sepse merr ato që jep. Unë politikën e shoh si një aspekt të jetës ku ty realisht të jepen mundësi në dorë për të ndikuar në jetët e njerëzve dhe për të marrë me vete një pasuri që s’merret me vete në varr por vepra të mira”, u shpreh Azemi.
Përsa i përket PD, ai ka deklaruar se ka shkuar në përçarje, ndërsa forcën politike e cilëson si trashëgiminë e të atit. “Sot është kthyer në interesa personale, realisht nuk po mendohet për popullin. Situatën sot e shoh jo mirë. Të paktën për mua që dua të angazhohem. Të paktën në PD se është trashëgimia ime. Nuk me pëlqen që në PD ka përçarje në vend qe duhet të merret me çështjet e kombit. Pengojnë avancimin e partisë përpara”, deklaroi ai.
Ndër të tjera ai tha se kur të jetë pjesë e politikës do të dojë të jap kontributin që ka dhënë i ati si për partinë dhe vendin në tërësi. Kujtojmë se pak kohë më parë ai u arrestua pas u kap me disa shokë duke ngarë makinën me shpejtësi të lart, si dhe ju gjetën disa doza kokaine.
