Drejtoria e Shërbimeve Qeveritare ka hapur garën për një tjetër tender ditën e sotme në shërbim të fasadës. Ky institucion ka parashikuar një fond limit prej 5,712,989 lekë të reja, para të cilat do të hidhen për pastrimin e fasadës të Pallatit të Kongreseve.
Ky tender do të jetë i hapur deri në 25 dhjetor të këtij viti, ku mes krizës që ka pushtuar vendin, qeveria ka parë të arsyeshëm shpenzimin marramendës jashtë çdo logjike. Vlen për t’u theksuar se një shpenzim i tillë është krejtësisht i panevojshëm për t’u konsumuar nga buxheti i shtetit, aq më tepër gjatë festave të fundvitit, ku shumë qytetarë nuk munden të festojnë për shkak të pamundësisë ekonomike. Mesa duket, qeveria do t’i bëjë qytetarëve dhuratë “fasadën e pastruar” të Pallatit të Kongreseve.
Por fasada nuk do të jetë i vetmi fond që është parashikuar të konsumohet nga xhepat e taksapaguesve shqiptarë. Bashkia Tiranë ka hapur një tjetër tender për blerjen e pajisjeve dixhitale në funksion të institucionit të drejtuar nga Erion Veliaj.
Dixhitalizimi i Bashkisë Tiranë do t’iu kushtojë qytetarëve 4,154,688 lekë të reja. Ky tender, po ashtu do të mbahet në muajin dhjetor, pasi afati i fundit për paraqitjen e ofertës nga ofertuesit është data 2 dhjetor. Si duket, ky tender do të jetë “dhurata” tjetër për qytetarët e Tiranës, ku monitorët e Veliajt në rrugët e kryeqytetit do t’iu kushtojnë goxha para taksapaguesve, të cilët “ushqehen” me propagandë.
Discussion about this post