Nikolin Kumbulla, babai i mbrojtësit të Kombëtares, Marashit ka kritikuar ish-kapitenin e ekipit kombëtar, Rudi Vatën. Sipas tij, djali i Vatës zgjodhi të luajë për Irlandën ndërsa nga ana tjetër shkodrani është një kritik i ashpër ndaj kuqezinjve.
“Së pari, duhet ta shohim rastin me kujdes, sepse ka pasur faull para se të përfundonte aksioni. Por përtej kësaj, nuk mundet që ta trajtosh kështu një djalë të ri, aq më tepër kur ke qenë vetë futbollist. Dakord, Rudi ka qenë futbollist i rëndësishëm dikur, por gjithçka ka edhe një moshë. Marashi është ende i ri dhe mund të gabojë, por Vata të mos bëjë sikur ka qenë perfekt vetë. Ky (Vata) që i kritikon të gjithë pa përjashtim çfarë është…?! Po i them diçka meqë e ka merak Shqipërinë…
Djali im kishte mundësi që të luante edhe me Italinë, por zgjodhi Shqipërinë. Po djali i Rudi Vatës me cilën kombëtare luan? Po ta donte kaq shumë Shqipërinë, Vata e kishte sjellë të birin të luante kuqezi, jo zgjidhte kombëtare tjetër. Kaq kam për t’i thënë Rudi Vatës”, ka deklaruar babai i Marash Kumbullës.
