Vetëm pak ditë pas arrestimit të autorit për vrasjen e të resë në Kosovë, babai i Marigona Osmanit ka ngritur një akuzë të papritur ndaj nënës së Dardan Krivaqës, duke pretenduar se ajo “pastronte prapësitë” e të birit. Në një intervistë, ai u shpreh se ajo punonte në Polici dhe ndihmonte të birin që të shpëtonte nga telashet.
“Ne asgjë nuk kemi ditur, në policinë e Ferizajt 136 dosje edhe del prokurori thotë i kam veç 10, ku janë 126, policia i ka mbyll se mama e tij ka qenë në shërbim në polici,”-deklaroi ai pak ditë më parë.
Por, Policia e Kosovës, konkretisht zëdhënësi i Policisë Rajonale në Ferizaj, Kanun Veseli, në një përgjigje për Gazetën Express ka thënë se nëna e Krivaqës nuk ka qenë dhe nuk është punësuar në Polici.
Sa i përket nënës së të dyshuarit Dardan Krivaqa, ajo as s’ka qenë, as nuk është e punësuar në Policinë e Kosovës”, tha Veseli për Gazetën Express.
Vrasja e 18-vjeçares Marigona Osmani tronditi opinionin politik në Shqipëri dhe në Kosovës. E reja u vra mizorisht pas dy ditësh dhunë sistematike, fizike e psikike nga bashkëshorti i saj, i cili e la pa jetë në derë të spitalit. Bashkë me të është prangosur edhe shoku i tij Arbër Sejdiu.
