Dardan Shabanhaxhaj e ka nisur në mënyrë fantastike sezonin në Slloveni tek Mura. 22-vjeçari ka shënuar 4 gola e ka dhënë 1 asist në 9 ndeshjet që ka luajtur, duke qenë shënuesi më i mirë i skuadrës së tij. Për “SuperSport”, Shabanhaxhaj tregon se është tejet i lumtur për këtë nisje sezoni, ndërsa beson se do të ruajë ritmin.
“Unë ja kam nisur mirë dhe jam i lumtur që edhe ekipi po shkon mirë. Me trajnerin e ri kemi gjetur një ritëm të mirë dhe dy ndeshjet e fundit i kemi fituar dhe jam shumë i kënaqur. Jam i lumtur me këtë nisje dhe shpresoj e besoj se do të vijoj me këtë ritëm. Kam patur një dëmtim vitin e shkuar, por këtë sezon jam kthyer shumë i fortë dhe falënderoj zotin”.
Shabanhaxhaj zbulon se synimi i tij është që një ditë të luajë në një nga pesë ligat kryesore në Europë.
“Dëshira ime është maksimale për të luajtur në një nga pesë ligat kryesore dhe shpresoj se një ditë do ta arrij”.
Në të shkuarën sulmuesi ka luajtur me 21-vjeçarët e Austrisë, por ai tregon se ëndrra e tij më e madhe është që një ditë të luajë për Kombëtaren kuqezi.
“Për momentin akoma jo, por nëse vijoj kështu do të vijë dhe ftesa. Është e vërtetë që kam luajtur me Austrinë U21 , por babai im është shqiptar, patriot dhe na ka mësuar që të duam atdheun që kur kam qenë fëmijë. Ëndrra ime është që një ditë të luajë për Shqipërinë 100%”.
Po ashtu Shabanhaxhaj zbulon se ai është një ndjekës i rregullt i Kombëtares, ndërsa tregon dhe një nga momentet më emocionuese që i ka mbetur në mendje.
“Që kur kam qenë i vogël e kam patur ëndërr dhe mbaj mend kur ikja me babain të shihja Shqipërinë. Ka qenë gjithnjë ëndrra ime të vesh fanellën kuqezi. Ka qenë një kujtim, një gol i Bekim Balajt kundër Portugalisë dhe të luaj me të ka qenë një dëshirë dhe ëndërr e imja”.
Shabanhaxhaj arriti që të shënonte në suksesin e Mura ndaj Domzala në javën e nëntë, por edhe performance e mirë kanë bërë që të përfshihet në formacionin më të mirë të javës në Slloveni.
Discussion about this post