Detaje të reja janë publikuar nga mediat greke lidhur me 28-vjeçarin shqiptar me banim në Volos të Greqisë, i cili dhunonte dhe mbante të mbyllur në banesë bashkëshorten e tij 22-vjeçare, po shqiptare, me të cilën kishte një vajzë.
Sipas mediave greke, 28-vjeçari përveç bashkëshortes së tij, dhunonte edhe vajzën 2 vjeçare.
“Ai do ta vriste”, tha një nga banoret e zonës që ndihmuan për t’i dhënë fund torturave të 22-vjeçares mëngjesin e së dielës.
Sipas saj, fëmija 2.5-vjeç që ishte në krahët e nënës së tij të gjakosur mbrëmjen e së enjtes kur u zbulua historia tragjike, bërtiste “mama-mama kur i shpëtuam”. Kjo grua ankohet në fakt se 28-vjeçari shqiptar “i ka ngritur dorën edhe fëmijës”.
Mediat greke shkruajnë se 28-vjeçari monitoronte çdo lëvizje të bashkëshortes së tij përmes një kamere dhe një aplikacioni në celular.
Historia tragjike e 22-vjeçares
Gruaja 22-vjeçare erdhi në Volos në vitin 2021 pas martesës me bashkatdhetarin e saj 28-vjeçar, një burrë mizor që nuk e la kurrë të mësonte greqisht, sepse nuk e lejoi kurrë të kishte kontakt me asnjë njeri. Tregues i egërsisë së 28-vjeçari është informacioni i përcjellë nga gegonota.neës se ai kishte rrahur 22-vjeçaren dhe kur dihej gjinia e fëmijës së tyre pasi ai nuk donte vajzë!
Kur lindi fëmija, nëna dhe foshnja jetuan për pesë muaj me grila të mbyllura dhe pa rrezet e diellit. Rrahjet ishin të përditshme dhe 28-vjeçari nuk e lejonte nënën të shkonte te mjeku për vaksinimin e fëmijës dhe as të thërriste mjekun në shtëpi.
Fillimi i fundit për aventurën e paimagjinueshme të 22-vjeçares ka ardhur mbrëmjen e së enjtes kur lagjia është mobilizuar pasi ajo ka bërtitur pas një rrahjeje tjetër.
Fqinjët kanë dalë jashtë shtëpisë dhe kanë goditur dyert, kanë lajmëruar policinë dhe kanë arritur të mos lejojnë arratisjen e 28-vjeçarit, i cili tentoi të largohej nga një hyrje nga pas banesës.
Policia e arrestoi dhe kur hynë në shtëpi panë nënë e bijë të traumatizuara. Nëna që kishte përqafuar fëmijën e saj ishte e mbuluar me gjak dhe me shenja mbytjeje. Menjëherë është lajmëruar ambulanca dhe gruaja dhe fëmija janë dërguar në spital. 22-vjeçarja nuk dinte greqisht dhe me ndihmën e një bashkatdhetari u shpjegoi mjekëve dhe policisë se bashkëshorti kishte tentuar ta mbyste.
“Kam ngrënë dru më të fortë, i kam ardhur shumë herë vdekjes. Ai më kërcënoi se nëse ikja në Shqipëri do të vinte dhe do të vriste prindërit e mi”, tha ajo në dëshminë e saj dhe e cilësoi burrin e saj si një njeri që ndiqte rregullat e mafies.
Nëna dhe fëmija janë nën mbrojtje me urdhër të prokurorit. Në daljen e tij para organeve të akuzës, autori ka mbetur pa fjalë dhe duket se nuk ka kuptuar as seriozitetin e ngjarjeve, as rëndësinë e referimit para drejtësisë për krime.
Discussion about this post