Të shumtë mund të jenë ata që i përfytyrojnë francezët me një beretë në kokë e duke mbajtur një bagetë në dorë, e cila është një bukë e famshme, tashmë jo vetëm në Francë, por që kjo e fundit ka vendosur ta mbrojë si pasuri kulturore në UNESCO. Por nga ana tjetër janë të shumtë ata që pyesin sesi gatuhet kjo bukë tradicionale. Një nga bukëpjekësit më të famshëm në Francë, Sebastian Mauviewx, tregon se duhen vetëm katër përbërës për përgatitjen e bukës së famshme dhe tradicionale, të njohur si bageta. Ju mjaftojnë miell, maja, ujë dhe kripë, megjithëse edhe kombinimi i tyre ka disa sekrete.
Bageta gjykohet për mënyrën e pjekjes, shijen, modelin dhe madhësinë. Sekreti, thotë Mauvieux, është në teknikë. Ai e vendos brumin e tij në një dhomë të ftohtë për të krijuar aromë dhe e lë atë gjatë natës para pjekjes. “Bageta tradicionale është pa produkte industriale. Ka vetëm miell gruri, kripë, maja dhe ujë. Kjo është e gjitha. Pastaj është teknika që ndryshon, në varësi të personit. Disa do ta bëjnë bazuar në maja natyrale, disa do ta thajnë, por sekreti është teknika”, shpjegon bukëpjekësi.
Mauvieux, i cili fitoi titullin për “Bageta më e mirë e Parisit në 2012” u shpreh se bageta është simbol i Francës po aq sa kulla Eifel. Madje, për këtë arsye, ata kanë kërkuar ta mbrojnë si trashëgimi në UNESCO dhe vendimi pritet në vitin 2022. Sipas Ministrisë së Kulturës në Francë, në vitet ’70 ka pasur rreth 55 mijë bukëpjekës të pavarur në mbarë vendin, kurse sot kjo shifër ka rënë në 35 mijë për shkak të “lehtësirave” që solli industrializimi i këtij sektori. Bageta daton që prej Shekullit të 17-të, por konsumimi i gjerë nisi vetëm pas viteve 1900. Sipas disa përllogaritjeve nga Planetoscope, rreth 320 bageta hahen çdo sekondë në Francë, ndërsa në vit konsumohen diku tek rreth 10 miliardë.
