Bajram Begaj do të jetë Presidenti i ri i Shqipërisë. Ai është votuar sot në raundin e katërt dhe të fundit nga 78 deputetë të mazhorancës pasi një pjesë e opozitës ka bojkotuar procesin. Në votim kanë marrë pjesë 83 deputetë, ku 78 deputetë kanë votuar pro, vetëm 4 deputetë kanë votuar kundër Begajt në krye të shtetit, ndërsa 1 deputet ka abstenuar. Mazhoranca ka 77 deputetë, pra një votë ka ardhur nga opozita.
Tashmë Begaj do të jetë presidenti i 8-të që pas shpalljes së pluralizmit. Komisioni i Ligjeve bëri verifikimet formale paraditen e sotme për Bajram Begajn sa i takon pastërtisë së figurës së tij dhe detyrimeve kushtetuese, konkretisht ligjit të dekriminalizimit dhe kritereve që përcakton Kushtetuta për kreun e shtetit.
Pas shqyrtimit të dosjes së kandidatit, komisioni votoi me votat e mazhorancës kandidaturën e Begajt duke e cilësuar kreun aktual të Kuvendit një figurë në përputhje me bazën ligjore. Relacioni zyrtar i dalë nga komisioni i ligjeve iu dërgua më pas sallës së Parlamentit për t’u hedhur në votim nga deputetët.
“Kandidatura e Metës plotëson kriteret kushtetuese. Kuvendi i Shqipërisë duhet të vijojë me raundin e katërt me kandidaturën e tij”, tha Kryetarja e Komisionit të Ligjeve Klotilda Bushka.
Kush është Presidenti Bajram Begaj?
Bajram Begaj ka lindur më 20 Mars 1967, ai është një oficer ushtarak shqiptar, i cili ka shërbyer si Shef i Shtabit të Përgjithshëm të Forcave të Armatosura Shqiptare. Detyrën e Shefit të Shtabit të Përgjithshëm të Forcave të Armatosura Shqiptare, Begaj e mori në vitin 2020.
Ai më parë ka shërbyer si Komandant i Komandës së Trajnimit dhe Doktrinës, Shef i Njësisë Mjekësore Ushtarake, Drejtor i Inspektoratit Shëndetësor dhe Kryeinspektor dhe Këshilltar i Inspektoratit Shëndetësor në Shtabin e Përgjithshëm të Forcës së Armatosur Shqiptare.
Gjatë karrierës së tij ushtarake ka kryer:
Kursin e Lartë për Sigurinë dhe Mbrojtjen, në Shqipëri;
Shkollën e thelluar pasuniversitare të mjekësisë, në Shqipëri;
Specializimin Pasuniversitar në profilin Gastrohepatologji, në Shqipëri;
Kursin e menaxhimit spitalor” dhe “Kursin e lidershipit mjekësor strategjik, në SHBA;
Specializimin në fushën e mjekësisë” dhe “Kursin e Shëndetësisë, në Greqi.
Gjeneral Major Bajram Rushit Begaj, ka përfunduar “Doktoraturën në Fushën e Mjekësisë”, në Shqipëri si dhe mban titullin “Profesor i Asociuar” në Mjekësi.
Begaj ka kryer detyra të ndryshme si:
Komandant i Komandës së Doktrinës dhe Stërvitjes,
Shef i Njësisë Mjekësore Ushtarake dhe Zëvendësdrejtor Ushtarak i SUT,
Drejtor i Spitalit Ushtarak
Drejtor i Inspektoratit Shëndetësor dhe Kryeinspektor dhe Këshilltar i Inspektoratit Shëndetësor, në Shtabin e Përgjithshëm Ushtarak Qendror Universitar, si dhe detyra të tjera në strukturat e Forcave të Armatosura.
Discussion about this post