Pak ditë më parë, mbrojtësi i Kombëtares, Adrian Bajrami 23 vjeç, braktisi Shqipërinë për Zvicrën teksa ekipi ishte grumbulluar për ndeshjen miqësore ndaj Gjibraltarit dhe Letonisë për kualifikueset e Botërorit 2026.
Por trajneri Silvinjo thotë se situata të tilla ndodhin kudo në botë. Megjithatë, ai shtoi se pasi u informua për këtë vendim, bisedoi për rreth 30 minuta me vetë Bajramin.
“Ne kemi plotësuar listën e pritjes që në datën 17 gusht, nuk kemi pasur ndonjë feedback nga klubet e lojtarëve. Kur kemi nxjerrë listën zyrtare nuk kishin ndonjë problem, por një ditë më pas dikush nga Federata më telefonoi dhe më tha që Bajrami ka zgjedhur të përfaqësojë Zvicrën. Kam folur me të për 30 minuta në telefon, por nuk kemi çfarë të themi sepse është një situatë që ndodh me shumë lojtarë nëpër botë”.
Pyetje: A ndihesh fajtor që nuk e aktivizove Bajramin në një ndeshje zyrtare?
Trajneri Silvinjo: Nuk ndihem në faj, gjithmonë mundohem të bëj më të mirën për grupin dhe ekipin. Kam një staf të mirë që kujdesen për ekipin dhe lojtarët. Bajrami para dy vitesh nuk luante shumë as te Benfica dhe u munduam ta suportojmë. E kemi grumbulluar dhe kemi folur, diskutuam specifikisht. Pas vendimit të tij kam folur për 30 minuta në telefon, por përsëri është një bisedë private që mbetet mes nesh. Është diçka që e kam përjetuar edhe në kombëtaren e Brazilit edhe pa qënë trajner kryesor. E njoh si histori dhe nuk kam çfarë të them më tepër. I uroj suksese lojtarit dhe nuk ndihem në faj.
Ndërkaq, trajneri i Kombëtares Shqiptare, Silvinjo, e konsideron Letoninë një ekip të vështirë dhe i fortë fizikisht.
Në konferencën për media një ditë përpara ndeshjes miqësore me Gjibraltarin, Silvinjo u shpreh se kuqezinjtë po e përgatisin shumë mirë ndeshjen ndaj Letonisë.
“Është një ndeshje shumë e rëndësishme, luajmë me Letoninë në shtëpi në Tiranë, është një ndeshje shumë e rëndësishme të cilën po e përgatisim shumë mirë. Letonia është një ekip i vështirë, një kundërshtar i vështirë, skuadër fizike dhe e organizuar. Kemi vuajtur në aspektin e fazës difensive në ndeshjen ndaj Letonisë. Jemi duke u përgatitur për këtë ndeshje të rëndësishme. Jemi shumë të lumtur me lojtarët që kemi dhe do të bëjmë më të mirën”, tha Silvinjo.
I pyetur për Brojën, Silvinjo u shpreh se është në gjendje të mirë dhe nuk ka asnjë problem. Ndërsa shtoi se nuk ndihen në presion për sfidën ndaj Letonisë.
Pyetje: Na duhet një fitore, a ka presion edhe për ju? Si është gjendja e Brojës?
Silvinjo: Ai është okej nuk ka asnjë problem dhe është në gjendje optimale, Broja e di që është lojtar i ri dhe duhet të luajë. Ai tashmë ka shkuar në një klub të mirë, Broja vazhdon të përmirësohet vazhdimisht, është në gjendjen optimale. Përsa i përket ndeshjes me Letoninë, nuk jemi në presion pasi shpesh herë kemi qenë në pozita të tilla. Jemi mësuar me një lloj presioni, duhet ta përgatisim ndeshjen në mënyrën më të mirë të mundshme”.
Ndeshja Shqipëri – Letoni, e vlefshme për kualifikueset e Botërorit 2026, do të luhet më 9 shtator në stadiumin “Air Albania” në Tiranë.
gijotina.com/
Discussion about this post