Për mesfushorin e Sassuolos, Nedim Bajrami, ndeshjet me Republikën Çeke dhe me Poloninë janë shumë të rëndësishme, ndërsa shtoi se të gjithë djemtë janë gati.
Duke folur në konferencë për mediet nga grumbullimi me Kombëtaren, 24-vjeçari deklaroi se Sylvinho ka pasur një impakt shumë pozitiv te ai, ndërsa vijoi duke thënë se ndjehet i lumtur që do kenë tifozë kuqezi në Pragë.
Kualifikueset? Me Çekinë kemi një ndeshje shumë të vështirë, është një kundërshtar fizikisht i fortë. Po e përgatisim ndeshjen shumë mirë, jemi të gjithë gati dhe do japim maksimumin.
Si ka ndikuar Sylvinho te ti? Më ka ndihmuar shumë, mentalisht dhe jam shumë i lumtur që ka ardhur këtu. Me rëndësi është që ndaj Çekisë të marrim tre pikë.
A keni folur me Ismajlin pas largimit dhe që tashmë të Empoli ka shkuar Berisha? Po me Asllanin dhe Ardian flasim çdo ditë. Jam i lumtur që Berisha ka gjetur skuadër dhe që luajti shumë mirë, por tani rëndësi ka Shqipëria dhe që të luajmë shumë mirë.
Rreth dy mijë tifozë kuqezi në Pragë, si ndikon te ju? Nuk besoj se kemi presion, na motivon më shumë dhe jemi të lumtur që vijnë tifozët në stadium, na ndihmojnë.
Cili repart do e bëjë diferencën dhe që duhet të jetë më në formë? Besoj se të gjithë duhet të jemi në formë, nuk ka një lojtar apo dy që e ndryshojnë ndeshjen. Të gjithë duhet të jemi në formë, të përgatitemi sa më mirë e të luajmë me shpirt.
Porositë e Sylvinhos? Nuk kam folur ende me trajnerin, por besoj se të gjithë jemi gati, të përgatisim ndeshjen sa më mirë dhe të japim maksimumin, pasi e dimë që Çekia është një kundërshtar shumë i fortë.
Shqipëria do të përballet, në kuadër të kualifikueseve të EURO 2024, me Republikën Çeke më 7 shtator në Pragë dhe me Poloninë më 10 shtator në “Air Albania”.
Discussion about this post