Kreu i grupit parlamentar të Partisë Socialiste Taulant Balla deklaroi jashtë selisë rozë se dora për Partinë Demokratike vijon të jetë e shtrirë për bashkëpunim pas 9 shtatorit, kushdo të jetë kryetar i PD-së. Balla iu përgjigj edhe kryedemokratit Lulzim Basha për deklaratën e bërë sot në lidhje me zgjedhjet në PS, duke theksuar se ai duhet t’i referohet socialistëve për modelin e partisë dhe organizimin e saj.
“Kemi miratuar një zgjatje të mandatit edhe të kryesisë së Partisë Socialiste dhe sekretariatit organizativ. Nuk kemi vendosur afat. Luli kur i referohet PS-së duhet t’i referohet si model i një partie që ka organizim të pakrahasueshëm dhe të gjithë anëtarët e vet i ka të disponueshëm.
Nuk po hyj në debatin e asaj partisë që nuk dihet kush do votojë më 13 qershor. Ne vazhdojmë ta mbajmë dorën e shtrirë dhe dëshirën tonë të pakushtëzuar për t’u ulur me PD-në sapo të fillojë legjislatura e re, me këdo që do jetë kryetar i PD. Maxhoranca ka detyrat e veta, opozita ka detyrat e veta, Duhet të gjejmë gjuhën e përbashkët për të çuar para shumë reforma që kërkojnë një shumicë që ne nuk e kemi.
Unë mendoj që është koha e duhur për të lënë mënjëanë pakënaqësitë por të shohim kush është votuar. Ka një shumicë që ka votuar për PS por ka dhe një pakicë që ka votuar për PD dhe ata presin që mandati t’i shërbejë Shqipërisë. Ne do të themi që kur flasim pa kushte, përballë PD-së është një letër e bardhë ku ata mund të propozojnë çështje. Është koha të gjejmë mundësinë që pas 9 shtatorit që në kuvend të vazhdojmë të diskutojmë. Kemi çështje që lidhen me reformën zgjedhore.
Komisioni do vijojë punën aty ku është lënë me adresimin e çështjeve të OSBE-ODHIR dhe ligji për financimin e partive politike. Kemi para një shans. Do bëjmë një prezantim të programit tonë qeverisës. Pa dyshim ju do jeni prezent. Dhe ju që mbuloni PS-në keni një meritë të veçantë”, deklaroi Taulant Balla.
