Ende pa përfunduar mega-operacioni i policisë, ministri i Brendshëm, Taulant Balla ka reaguar me shpejtësi për të marrë meritat dhe për të varur medalionin vetes me aksionin e Policisë së Shtetit të zhvilluar në disa qytete të vendit ku janë arrestuar disa policë, biznesmeni Pëllumb Gjoka dhe prokurori i rrethit Kukës.
Në një postim në Facebook, Balla thotë se në këtë operacion ranë në pranga eksponentë të krimit të organizuar, zyrtarë të Policisë së Shtetit, prokurorë të korruptuar, por në asnjë rresht nuk përmend prangosjen e biznesmenit Pëllumb Gjoka që dikur është akuzuar nga opozita për blerje votash në “llogari” të Partisë Socialiste.
Balla përgëzon policinë e shtetit për këtë aksion por ‘harron’ që biznesmini Pëllumb Gjoka (tashmë i arrestuar) nuk është një emër i panjohur, pasi ai është shpallur investitor strategjik nga qeveria Rama, madje është akuzuar vazhdimisht nga opozita për lidhje të ngushta me kryeministrin.
Së fundmi, pas zgjedhjeve të 14 majit, kreu i opozitës, Sali Berisha e akuzoi Gjokën se ishte implikuar në manipulimin zgjedhor në zonën e Velipojës në Shkodër. Disa herë, Berisha deklaroi se në Shkodër u shpërndanë të paktën 12 milionë euro për blerjen e votave, kurse Pëllumb Gjoka ruante qendrat e votimit me makina të blinduara.
Reagimi i plotë nga Taulant Balla:
“Gjatë gjithë natës së sotme Policia Shtetit ka finalizuar një operacion kompleks të goditjes së krimit të organizuar, rezultat konkret i bashkëpunimit të ngushtë me Prokurorinë e Posaçme, të cilën e falënderoj për bashkëpunimin dhe besimin. Në rrjetën e këtij bashkëpunimi kanë rënë eksponentë të krimit të organizuar, zyrtarë të Policisë së Shtetit, si edhe prokurorë të implikuar me krimin.
Ky operacion domethënës është një pasqyrë e qartë e vullnetit të agjencive tona ligjzbatuese për ta goditur krimin në të gjithë spektrin e tij dhe për ta çuar në një nivel tjetër zotërimin e shtetit në funksion të rendit ligjor në Republikën e Shqipërisë.
Përgëzoj drejtuesit dhe pjesëmarrësit e uniformave blu në këtë operacion, për profesionalizmin e lartë dhe mbi të gjitha për sigurinë e plotë të informacionit sensitiv deri në finalizimin e operacionit.
Gjithashtu shpreh besimin e plotë se forcimi i bashkëpunimit mes agjencive ligjzbatuese dhe lufta e përbashkët për spastrimin e vatrave të krimit përballë dhe brenda vetë organizmit të shtetit, do ta çojë Shqipërinë në një tjetër nivel të sundimit të ligjit.
Faleminderit të gjithëve dhe vetëm përpara!”, shkruan Balla.
lexo edhe:
Arrestohet drejtuesi i Prokurorisë së Kukësit si dhe biznesmeni Gjoka
Discussion about this post