Senaca e sotme parlamentare nisi sërish me debate mes partive të vogla opozitare të cilat nuk kanë braktisur Kuvendin dhe mazhorancës.
Deputeti i Lëvizjes Bashkë, Redi Muçi, ngriti në seancën plenare çështjen e deklaratës së ministres serbe Snezhana Paunoviq lidhur me spastrimin etnik në Kosovë. Ai kërkoi sqarim se pse qeveria shqiptare nuk ka ndërmarrë të njëjtin hap si Kosova, e cila e ka shpallur ministren serbe “non grata”.
Nga foltorja e Kuvendit, Muçi i bëri thirrje qeverisë shqiptare të mbajë një qëndrim ndaj deklaratës së ministres serbe dhe kritikoi mungesën e reagimit nga kryeministri Edi Rama.
“Spastrimi etnik është krim ndaj njerëzimit. Deklarata të tilla janë në shkelje të Kushtetutës së Republikës së Shqipërisë. Nëse Rama nuk mban qëndrim për deklaratën e ministres serbe, për çfarë do të mbajë qëndrim? Ky kryeministër si ka mundësi që nuk thotë çerek llafi kur njeriu i Vuçiçit flet për spastrim etnik? Ka lëshuar Taulant Ballën të sulmojë edhe gazetarët dhe nuk harroi të merrej edhe me Dua Lipën. Si ka mundësi që nuk mban një deklaratë për ministren serbe për spastrim etnik të shqiptarëve që jetojnë në Kosovë?”, tha Muçi.
Balla i është kundërpërgjigjur duke thënë se Qeveria shqiptare reagoi në kohë nëpërmjet deklaratës së ministrit të jashtëm. Ndër të tjera Balla e quajti Muçin ‘karagjoz politik’, duke e çuar mbrojtjen ndaj Ramës edhe më tej, ku i tha deputetit ‘laj gojën kur flet për kyrminsitrin’.
“Sa i përket një deklarate jo vetëm të papërgjegjshme, por edhe të rëndë, reagimi i qeverisë shqiptare ka qenë në kohë nga Ministria e Jashtme. Ndërkohë, këto janë çështje që nuk adresohen në karagjozllëk politik, por janë çështje me rëndësi kombëtare që s’mund të talleni me një aspekt procedural. Ne nuk tallemi me çështjet kombëtare, nuk jemi karagjozë si puna jote. Qëndrimin e kemi mbajtur në nivelin e qeverisë, politik. Kam reaguar shumë përpara teje, meqë u bëmë si kalamajtë e kopshtit; ti ishe në gjumë kur kam reaguar unë. Natyrshëm, ky akt i dënueshëm është dënuar edhe nga autoritete politike përfaqësuese që ne komunikojmë, Komisioni Evropian. Shqipëria, kur reagon, reagon bashkë me aleatët e vet. Është turp të vish dhe të bësh politikë.
Sa i përket Edi Ramës, ti dhe shokët tuaj duhet të lani gojën mirë, pasi është i vetmi kryeministër që çështjen e Kosovës e ka ngritur në mes të Beogradit. Edhe në 2014, në Beograd, ka deklaruar që Kosova është shtet i pavarur dhe Shqipëria mbështet fuqimisht anëtarësimin e Kosovës në NATO dhe BE”, tha Balla.
Discussion about this post