Ministri i Brendshëm, Taulant Balla, ka zhvilluar një takim me pjesëtarë të Operacionales në Durrës, nga ku tha se çdo ditë po kryen goditje të rëndësishme ndaj krimit.
Ai bëri me dije se do të ofrojë mbështetjen e tij pa rezerva për të gjithë ata që përkushtohen në rrugën kundër krimit, njësoj si djemtë dhe vajzat që ka takuar vazhdimisht në cilësinë e ministrit të Brendshëm.
Por ministri i Brendshëm paralajmëroi se ata që nuk e kanë vullnetin për të bërë punën e tyre, nuk do të mund ta mbajnë më pozicionin që kanë.
Postimi i plotë:
Çdo ditë në detyrën e Ministrit të Brendshëm po njoh djem dhe vajza, punonjës të Policisë së Shtetit në shërbimet bazë të cilët kanë dedikimin dhe angazhimin e duhur në realizimin e detyrës.
Të tillë janë djemtë e Forcës Operacionale Durrës, të cilët po kryejnë çdo ditë goditje të rëndësishme ndaj krimit. Prandaj sot dua ta përsëris se kush do të jetë i gatshëm për ta bërë këtë në pozicionin që ka në vijën e këtij fronti të përbashkët, do të ketë mbështetjen time pa rezerva në çdo hap dhe derën time të hapur pa orar për çdo nevojë.
Ndërsa kush nuk do të tregojë gatishmërinë për të shkuar përtej vetes, duke e rritur kontributin për kauzën e përbashkët, do ta ketë të pamundur të qëndrojë në pozicionin që ka.
Discussion about this post