Ministri i Brendshëm, Taulant Balla, paralajmëroi sot një rishikim të kompetencave të Prefektit dhe rolin të tij.
Kjo u bë e ditur nga Kukësi, ku Balla prezantoi Prefektin e ri të qarkut, Albert Halilaj.
“Ka ardhur koha për të rishikuar dhe ri-dimensionuar rolin e prefektit në kuadër të reformës administrative territoriale dhe ligjit për vetëqeverisjen vendore”, tha Balla.
Idea për të rishikuar kompetencat e Prefektit është hedhur për herë të parë në vitin 2016 nga LSI, parti e cila në atë kohë ishte pjesë e koalicionit qeveritar të udhëhequr nga Partia Socialiste. Në atë kohë, deputetë të LSI propozuan që Komisioni i Ligjeve të rriste kompetencat e Prefektëve, pasi roli i tyre konsiderohej si “honorifik”. Gjithashtu në atë kohë kërkohej që Prefektët të kishin rol në procesin zgjedhor, e para sa i takon listave të zgjedhësve dhe së dyti në caktimin e qendrave të votimit.
Nuk dihet nëse Balla në paralajmërimin e tij ka pasur parasysh ose jo propozimet që janë hedhur nga LSI rreth 7 vite më parë, apo socialistët kanë ndonjë projekt gati që thjesht do e formalizojnë.
Duke folur rreth raporteve të prefektit me të zgjedhurit lokalë, Balla u shpreh se prefekti duhet të monitorojë vazhdimisht vendimet e marra nga këshillat bashkiake.
“Natyrshëm është dhe marrëdhënia e prefektit me të tria Bashkitë. Të gjitha vendimet e këshillave konfirmohen nga prefekti. Prandaj z. prefekt roli juaj merr një rëndësi shumë të madhe, pasi duhet vlerësuar ligjshmëria e tyre. Nëse konstatohet se vendimi i këshillit bashkiak bie ndesh me legjislacionin apo interesat publike, ju keni të drejtë t’i rikthesh për rishqyrtim”, u shpreh Balla.
Prefekti i ri i qarkut Kukës Albert Halilaj u emërua në këtë detyrë nga Kryeministri Edi Rama më 19 korrik, pas lirimit nga detyra e ish-prefektit të qarkut Ali Hallaçi.
Discussion about this post