Ballkani i Suharekës, ka treguar mbrëmjen e sotme, se nuk është rastësi që gjendet përsëri, pranë fazës së grupeve të Conference League.
Kampionët e Kosovës, triumfuan me rezultat bindës 4-1, përballë bjellorusëve të BATE Borisov, skuadra që, në turin e parë kualifkues të Champions League, eliminoi Partizanin e Tiranës.
Ndryshe nga “demat” ama, Ballkani nuk kishte probleme me shënjestrën, duke realizuar një poker golash, në takimin e vajtjes së fazës “play-off”, të zhvilluar në Prishtinë.
Djemtë e trajnerit Ilir Daja, e nisën në vështirësi duelin, duke pësuar gol, në minutën e 10’, nga Laptev.
Goli i hershëm, nuk e demoralizoi skuadrën kosovare, e cila u hodh në sulm, në kërkim të barazimit. Në minutën e 31’, baraspesha e shumëpritur erdhi, falë ish-lojtarit të Skënderbeut, Bajram Jashanica, që goditi saktë me kokë, duke mposhtur portierin e bjellorusëve.
Me barazimin 1-1, përfundoi fraksioni i parë i lojës. Në pjesën e dytë, skenën, e mori Ballkani, që dominoi për pjesën drastike të 45 minutave të dyta, duke e bërë BATE-n që të mbyllet në mbrojtje.
Në minutën e 58’, Tolaj realizoi golin e epërsisë për vendasit, të cilët morën hov akoma më shumë për të shënuar përsëri dhe fisk, 9 minuta më vonë, i njëjti futbollist, realizoi të tretin për Ballkanin, duke e afruar skuadrën nga Suhareka, akoma më shumë me fazën e grupeve.
Avantazhi prej dy golash, nuk jepte shumë siguri, kështu që Ballkani, shënoi dhe golin e katërt, me anë të Thaqit, në minutën e 89’.
Në fund 4-1, me Ballkanin që shkon në takimin e kthimit, me një avantazh shumë të madh, megjithatë, në futboll kurrë nuk i dihet./m.b. /gijotina.com
Discussion about this post