Deputeti demokrat, Ferdinand Xhaferaj, ka risjellë sot në vëmendje çështjen e “Open Balkan”. Ai ka reaguar përmes një postimi në Facebook për këtë çështje, ku thekson se është një projekt që nuk i shërben interesave të shqiptarëve. Xhaferaj shkruan se gjatë një vizite që bëri në Kosovë me anëtarët e tjerë të Komisionit të Sigurisë së Kuvendit të Shqipërisë konstatoi se Serbia perceptohej si rreziku kryesor për shqiptarët atje. Sipas tij, nuk mundet që Shqipëria të bëhet pjesë e marrëveshjeve të tilla rajonale pa marrë në konsideratë edhe interesat e shqiptarëve në rajon.
“Ku qëndron hapja me Serbinë teksa në të gjitha takimet në Kosovë ku përfshihej Ministri i Mbrojtjes, Kreu i Kuvendit të Kosovës, Kreun i Agjencisë të Inteligjencës së Kosovës dhe Komisionet Kuvendore që merren me sigurinë në Kosovë lehtësisht konstatohej se kërcënimi kryesor i sigurisë ne Kosovë është rreziku nga Serbia dhe Rusia. Një nismë që nuk shkon edhe në interes të shqiptarëve të Kosovës dhe rajonit nuk ka se si të jetë në interes të Shqipërisë.
Ndërkohë shqiptaret përtej kufirit shtetëror e ndjejnë dhe e vuajnë Serbinë si rrezik të madh kombëtar, Kryeministri Rama e sheh dhe e trajton Serbinë si partner të madh tregtar. Teksa Shqipëria është në pozicionin për të lobuar maksimalisht për normalizimin e marrëdhënieve ndërmjet Kosovës dhe Serbisë, ajo zgjedh të përmirësojë marrëdhëniet Rama-Vuçiç”, shkruan Xhaferaj duke shtuar se marrëveshjet janë të mirëpritura, por fillimisht duhen parë se cilat janë interesat e shqiptarëve. Kujtojë se nisma “Open Balkan” është kritikuar shumë nga opozita, ndërsa qeveria kosovare ka deklaruar se nuk do të behet kurrë pjesë e saj.
Discussion about this post