Erion Braçe ka folur për herë të parë për largimin nga zona e Divjakës, pas përplasjes me drejtuesen e Qarkut të Fierit Belinda Ballukun, të cilën nuk do ta mbulojë për zgjedhjet parlamentare të 11 Majit.
Braçe deklaroi se e kanë larguar pa dëshirë, pasi ka këmbëngulur prej 1 jave që të mos lëvizë nga zona e tij elektorale për shkak të marrëdhënieve që ka krijuar me banorët e zonës
I pyetur nëse a i kanë thënë një arsye pse e largoi Rama dhe Balluku nga Divjaka, Braçe tha se nuk e merr të mirëqenë atë që i kanë thënë, duke mos qenë një arsye konkrete.
Deputeti socialist nuk dha një përgjigje konkrete kur u pyet nëse ishte Rama apo Balluku, ai që e mori vendimin për largimin e tij nga Divjaka, teksa shtoi më tej se lajmin e ka marrë vesh nga media. Gjithashtu, Braçe deklaroi se nuk ka ende një vendim për caktimin e tij në njësinë nr. 5 në Tiranë.
“Erion Braçe nuk ka lënë gjë. Erion Braçe në harkun e vetëm një jave nuk ka dashur të lëvizë nga zona e tij elektorale dhe ka një arsye, unë nuk jam nga ata deputetët që ndërron zonë elektorale, as për t’i ikur përgjegjësive të mia, as se nuk kam përmbushur përgjegjësitë e mia, nuk jam nga ata deputetë që ndërroj numër telefoni, kam të njëjtin numër që kam pasur në Berat që kur janë vendosur kompanitë e terlefonisë së lëvizshme dhe s’e kam ndërruar se kjo është marrëdhënia që kam me njerëzit.”, tha Braçe.
Ju thoni që një javë këmbëngulët që të mos e ndërroni zonën tuaj elektorale, pse? Ose a ju thanë një pse?
“Jo mua nuk më kanë thënë një pse, ose kam një pse që natyrisht nuk më shkon që ta marr të mirëqenë. Pra një pse si arsye, jo një pse timen. Pse-ja ime është shumë e thjeshtë, unë e kam shumë të vështirë t’i lë njerëzit në mes të rrugës, shumë e thjeshtë, e kam po kaq të vështirë që të fshij atë që është puna ime dhe të fillojmë një gjë nga e para. Është më shumë se sa një karrige. Ka qenë shumë e vështirë për ta pranuar, është e vështirë për të lënë njerëzit”, tha Braçe për emisionin “Shqipëria Live”.
Ishte një vendim i kryeministrit Edi Rama apo i Belinda Ballukut?
“As nuk ka rëndësi fare kjo gjë” – tha Braçe.
Po tek njësia nr. 5 a e keni nisur punën, takimet?
“Atje banojnë prindërit e mi dhe pothuajse çdo fundjavë eci në këmbë atje dhe kaq, nuk ka filluar gjë tjetër sepse nuk ka një vendim akoma. Përgjithësisht, edhe këtë lajmin e kam marrë vesh nga mediat, doli një lajm “Erion Braçe ikën nga Divjaka pas sherrit me strukturat e PS”. Ishte kryeministrit të shtunën në Divjakë dhe u konfirmua edhe ky lajm që Erion Braçe jo vetëm që nuk ka problem me strukturën e PS në atë zonë, siç thuhej në atë median klienteliste, por ka një marrëdhënie të shkëlqyer. Problemi tek lajmi ishte klientelizmi.” – tha Braçe.
Discussion about this post