Tenderët pa garë për kompanitë e miqve të qeverisë nuk kanë fund. Qokën e radhës e ka bërë Belinda Balluku ndaj njërit prej oligarkëve më të preferuar të Ramës. Bëhet fjalë për Salillarin, i cili ka futur në xhep plot 14 milion euro në një tender pa konkurrent tjetër.
Bëhet fjalë për tenderin e ARRSH-së me numër reference REF-21796-03-10-2022, i cili ka si objekt lotin e 4 Kontrata D – Mirëmbajtje me performancë e akseve kryesore të Rajonit Jugor, me vlerë totale 1,411,691,646 lekë të reja pa TVSH ose gati 14 milion euro me TVSH. Në garë ka marrë pjesë vetëm kompania “Salillari” SH.p.k, e cila duke mos pasur asnjë konkurrent tjetër, është shpallur fituese.
Por përveç mungesës së konkurrencës, bie në sy një fakt akoma më i dyshimtë i cili përforëcon idenë se kemi të bëjmë me një fitues të paracaktuar. Bëhet fjalë për vlerën fituese e cila rezulton të jetë thuajse sa 100% e fondit limit. Salillari ka marrë pjesë në tender dhe ka ofruar vlerën prej 1.411.597.878 lekë të reja pa TVSH ose gati 14 milion euro përfshirë TVSH.
Pra, qartazi kemi të bëjmë me një ndër rastet më tipike për të cilat SPAK duhet të hetojë pa mëdyshje, pasi më një të rënë të lapsit Salillari ka marrë pa u lodhur fare një shifër të llahtarshme në një kohë kur kriza ka mbërthyer vendin.
Discussion about this post