Balluku në Presidencë/ Clinton ikën nga Shqipëria, Presidenti Begaj shërohet?!

Një ditë më parë në bulevardin “Dëshmorët e Kombit”, përballë Kryeminitrisë, u mbajt ceremonia në nder të ish-Presidentit amerikan, Bill Clinton, të cilit iu akordua medalja “Ylli i Mirënjohjes” nga Kryeministri Edi Rama.

Të njëjtën medalje, Rama ia akorduar më parë edhe ish-kancelares Angela Merkel, ish-ambasadores Yuri Kim, por edhe sportistes rekordmene shqiptare, Luiza Gega.

Në ceremoninë e organizuar nga Kryeministri, i cili duket se e shfrytëzoi me detaje, mungonin ish-Presidenti Ilir Meta, të cilin nuk e kishte ftuar, por edhe Presidenti Bajram Begaj. Për këtë të fundit u tha se mungonte për arsye shëndetësore.

Mediat cituan Këshilltaren e Presidentit Arta Sakja të ketë sqaruar se Kreu i Shtetit, Bajram Begaj, nuk ka mundur të marrë pjesë për shkak të problemeve shëndetësore.

Ndërkohë sot raportohet nga mediat se Presidencën e ka vizituar zv.Kryeministrja Belinda Balluku. Me shumë gjasë Balluku, e cila është parë të hyjë në godinën e Kreut të Shtetit rreth orës 13:15 është takuar me Presidentin Begaj, pasi vështirë se zv.kryeministrja të ketë shkuar në këtë institucion për tu takuar me stafin e tij.

Dhe nëse Begaj, që me shumë gjasë ka pritur në takim Ballukun, ose është shëruar me largimin e ish-Presidentit Clinton nga Shqipëria, ose biseda me zv.kryeministren ka qenë aq shumë e rëndësishme sa Kreut të Shtetit i ëhstë dashur të lërë mënjanë anën shëndetësore. Për takimin ose vizitën e Ballukut në Presidencë ende nuk ka një njoftim zyrtar, ndërsa zv.Kryeministrja mbulon sektorët e energjitikës, por edhe çështje të lidhura me sigurinë kibernetike, temë kjo e trajtuar pak ditë më parë edhe në mbledhjen e Këshillit të Sigurisë Kombëtare, që drejtohet nga Begaj.

Mungesa e Begajt në ceremoninë e organizuar nga Edi Rama u interpretua si një “formë bojkoti”, pasi Kreu i Shtetit ishte trajtuar si të gjithë të ftuarit e tjerë, ndërkohë që bazuar në ligj ai ka të drejtën të nderojë me dekoratat më të larta një ish-President amerikan, që ka një kontribut të jashtëzakonshëm në raport me shqiptarët, veçanërisht në krizën e 1999-ës. Dhe nëse Presidenti do t’i akordonte ish-Presidentit Clinton një prej dekoratave, me shumë gjasë, Kryeministri Edi Rama dhe medalja që iu jep personazheve të ndryshme, do të mbeteshin në “hije”.