Drejtuesi Politik i PD-së në Qarkun Fier, Gazment Bardhi, ka hedhur akuza ndaj zv.kryeministres Belinda Balluku për blerje votash në Lushnje, Divjakë dhe Fier
Në një postim në Facebook, Bardhi shkruan se blerja e votave bëhet nga një personazh me emrin “Tan Lepri”, për të cilin Bardhi thotë se lëviz me bekimin e Belinda Ballukut dhe nën mbrojtjen e Policisë së Shtetit.
“Tan Lepri” mendon se me paratë e pista të përfituara në shkelje të ligjit nga Belinda, do të blejë dinjitetin e qytetarëve të qarkut Fier”, thotë Bardhi, teksa e cilëson terrorist elektoral.
Më tej Bardhi shkruan se SPAK duhet të veprojë, pasi është urgjente.
Postimi i plotë:
Prej shumë kohësh tashmë, në disa zona në Lushnje, Divjakë dhe Fier, lëviz me bekimin e Belinda Ballukut dhe nën mbrojtjen e Policisë së Shtetit, një personazh me emrin “Tan Lepri”, që mendon se me paratë e pista të përfituara në shkelje të ligjit nga Belinda, do të blejë dinjitetin e qytetarëve të qarkut Fier.
Ky personazh është një terrorist elektoral dhe do të trajtohet me gjithë forcën e ligjit si i tillë. Nuk ka për t’u amnistuar askush që mendon se në vitin 2025 mund të shërbejë si kamikaz për të hedhur në erë zgjedhjet e lira dhe të ndershme.
Shpreh keqardhjen e plotë që edhe pse vetëm 3 ditë nga data e zgjedhjeve SPAK ende nuk ka gjetur kohë të merret me krimet zgjedhore në Fier, edhe pse ka një mal me përgjime, materiale e denoncime për secilin prej terroristëve elektoral që po vepron në këtë qark, përfshirë personazhin në fjalë. Është urgjente që kufinjtë e ligjit të tregohen përpara zgjedhjeve, sepse ndëshkimi në kohë është jetik për demokracinë dhe shtetin ligjor.
Discussion about this post