Gjatë dëshmisë së tij në gjyqin për dosjen “Partizani”, ish-presidenti Bamir Topi ka mohuar të ketë pasur presion apo ndikim nga Sali Berisha, Jamarbër Malltezi apo persona të tjerë të përfshirë në çështje.
I pyetur nga Jamarbër Malltezi nëse kishte pasur presion prej tij, Berishës apo personave të tjerë, Topi u përgjigj prerë:
“Kurrë, kurrë! Nuk kam pasur asnjë lloj komunikimi apo presioni të kësaj natyre. Nuk ka dalë ndonjëherë kjo histori. Asnjëherë!”, tha ish-presidenti.
Topi shtoi se të njëjtën deklaratë e kishte bërë edhe më herët gjatë komunikimeve me prokurorinë, duke theksuar se nuk kishte pasur asnjë ndërhyrje apo presion gjatë ushtrimit të detyrës së tij.
Bamir Topi është thirrur për të dëshmuar në këtë proces, ndërsa në sallën e gjyqit janë të pranishëm prokurorët e SPAK, Arben Kraja dhe Enkelejda Millonai. Sali Berisha nuk ndodhet në seancë, por përfaqësohet nga avokatët e tij, ndërsa të pranishëm janë Jamarbër Malltezi dhe Xhimi Begeja.
Ish-presidenti Bamir Topi ka dhënë sqarime për procedurën e nxjerrjes së pronës së ish-kompleksit sportiv “Partizani” nga plani i përhapjes dhe rolin e institucionit të Presidentit në këtë proces.
Në një prononcim për mediat, Topi deklaroi se prona doli nga plani i përhapjes në gusht të vitit 2007 dhe se pas këtij vendimi ajo nuk ishte më në administrimin e ushtrisë.
Sipas tij, pas daljes nga administrimi ushtarak, kompleksi kaloi në administrimin e strukturave shtetërore dhe hyri në një proces privatizimi, për të cilin Presidenti nuk kishte kompetencë vendimmarrëse. “Nuk mund të jap opinion personal për një çështje që është ende në gjykim”, u shpreh Topi.
Ish-presidenti theksoi se plani i përhapjes përgatitej nga Shtabi i Përgjithshëm dhe institucionet përgjegjëse, ndërsa Presidenti kishte rolin e firmosjes së aktit pasi procedurat ishin përfunduar. “Presidenti firmoste aktin, por nuk merrte pjesë në përgatitjen e planit”, deklaroi Topi, duke shtuar se kompetencat e kreut të shtetit përcaktoheshin nga Kushtetuta dhe ligji.
Sipas tij, çështja e pronës kishte dimension politik, ushtarak dhe teknik, ndërsa Presidenca kishte dëgjuar shqetësimet e paraqitura, por nuk kishte kompetencë mbi administrimin apo privatizimin e pronës.
Discussion about this post