Një mini “Disneyland” u ndërtua në burgun “Tocoron” të Venezuelës nga organizata kriminale “Tren de Aragua”, siç u zbulua nga 11 mijë policë dhe ushtarakë që bastisën burgun.
Fotot e postuara në internet tregojnë se çfarë u gjet brenda ndërtesës: një kopsht zoologjik, një kazino, një klub nate, një pishinë dhe një supermarket.
Siç raporton gazeta britanike “Daily Mail”, bastisja e policisë ka ndodhur pasditen e së mërkurës ndërsa shumë anëtarë të bandës “Tren de Aragua” ishin bërë tym.
Qeveria e Venezuelës vendosi 11,000 ushtarë dhe policë në një operacion që çoi në kapjen e burgut në shtetin veri-qendror të Venezuelës, Aragua.
Forcat e sigurisë hynë në burg dhe u befasuan kur zbuluan një kopsht të vogël zoologjik të ngritur nga banda “Tren de Aragua”, e cila prej vitesh kishte epërsinë në burg.
Anëtarët e bandës, të udhëhequr nga Héctor “Niño” Guerrero, thuhet se u arratisën një ditë para bastisjes së policisë, komenton botimi britanik. Burgu tani është nën kontrollin e qeverisë venezueliane.
Organizata famëkeqe kriminale kishte ngritur kasolle të vogla brenda burgut ku disa anëtarë jetonin me familjet e tyre dhe kishin akses në TV satelitor dhe internet.
Discussion about this post