Reshjet e dendura të shiut kanë përmbytur pothuajse gjithë qarqet e vendit. Niveli i lumit Vjosa ka rënë, por dhjetëra hektarë tokë bujqësore janë ende nën ujë.
Uji është larguar nga banesat, duke lënë pas baltë dhe llum. Banorët të cilët kanë ngelur në “mëshirë të fatit” kanë qëndruar te familjarët e tyre. Ata apelojnë për ndihmë, ndërkohë që thonë se dëmet janë të shumta, uji u ka shkatërruar pajisjet elektroshtëpiake.
“Unë bëj thirrje kush të më ndihmojë, kush e dëgjon, qeveria tek ajo mbështetemi, edhe bizneset të na ndihmojnë. Emergjencat kanë qenë, kur erdhi uji nuk futej këmbë robi. Shyqyr që doli dielli që të ngrohemi, por çfarë do të bëjmë natën. Fëmijët i kemi të larguar, gjithsekush punon për vete, nuk di çfarë të bëj gruan e kam me problem shëndetësore”, thotë një banor.
Një tjetër banor shprehet se “Jemi katër pjesëtarë. Çdo gjë është e njomur, edhe pse e kam ngritur shtëpinë, uji hynte nga dritarja. Nuk dimë çfarë do të bëjmë. Natën e kemi kaluar nëpër njerëz. Lavatriçja noton në ujë”.
Discussion about this post