Drejtuesi i projektit të burimeve ujore dhe ujitjes Regassa, Ensermu Namara, ka sqaruar se projekti i sistemit të ujitjes në Divjakë është realizuar plotësisht dhe është dorëzuar tek bashkia përfituese brenda afateve ligjore. Kështu Banka Botërore ka hedhur poshtë të gjitha akuzat e ngritura të ish-deputetit Myslim Murrizi, i cili pak javë më javë depozitoi një kallëzim në SPAK për ish-ministrin e Bujqësisë Edmond Panariti dhe ish-sekretarin e përgjithshëm të kësaj ministrie, Vojo Bregu.
Madje zyrtari i Bankës Botërore shton se procesi i vlerësimit për të siguruar pajtueshmërinë me udhëzimet e Bankës Botërore është monitoruar nga vetë ekspertët e Bankës Botërore. Zyrtari Regassa Ensermu Namara nuk ka pasur asnjë ankesë nga ndonjë prej firmave konkurruese në këtë lot, qoftë drejtuar agjencisë zbatuese, ministrisë së Bujqësisë dhe Zhvillimit Rural apo Bankës Botërore. Ai konfirmon se jo vetëm që projekti është dorëzuar, por është përfunduar brenda afateve ligjore, më 17 dhjetor 2018, në vijim të periudhës së garancisë.
“Projekti është realizuar plotësisht dhe është dorëzuar tek bashkia përfituese brenda afateve ligjore. Sipas marrëveshjes ligjore mes Bankës Botërore dhe Qeverisë së Shqipërisë, Projekti për Burimet Ujore dhe Ujitjen është zbatuar duke përdorur udhëzimet e Bankës Botërore për Prokurimet, përfshirë këtu dhe kontratën e lartpërmendur. Procesi i vlerësimit për të siguruar pajtueshmërinë me udhëzimet e Bankës Botërore është monitoruar nga vetë ekspertët e Bankës Botërore. Nuk ka pasur asnjë ankesë nga ndonjë prej firmave konkurruese në këtë lot, qoftë drejtuar agjencisë zbatuese, ministrisë së Bujqësisë dhe Zhvillimit Rural apo Bankës Botërore,”- shprehet zyrtari.
Banka Botërore konfirmon se jo vetëm që është dorëzuar, por është përfunduar brenda afateve ligjore, më 17 dhjetor 2018, në vijim të periudhës së garancisë.
Myslim Murrizi depozitoi në SPAK një kallëzim penal për abuzim me dy tendera në Divjakë. Murrizi akuzon ish-ministrin e Bujqësisë Edmond Panariti dhe ish-sekretarin e përgjithshëm të kësaj ministrie, Vojo Bregu për abuzim me paratë publike lidhur me dy tendera, atë 6 milionë euro për projektin e sistemit te ujitjes në Divjakë për ujitjen e 2800 hektarëve tokë dhe për tenderin 4.5 milionë euro për blerjen e 1912 lopëve nga Danimarka. Sipas Murrizit, ky projekt ujitjeje nuk u vu kurrë në pune dhe çmimi i lopës që është shkruar në tender është tre herë më i lartë se çmimi i tregut.
