Rezerva valutore e Bankës së Shqipërisë në muajt e parë të këtij viti është stabilizuar pranë nivelit të 4 miliardë eurove.
Të dhënat e Bankës së Shqipërisë tregojnë se në fund të muajit prill mjetet e rezervës kishin vlerën e 3.96 miliardë eurove, me një rritje shumë të lehtë prej 0.4% që nga fillimi i vitit. Rezerva valutore ngelet ndjeshëm më e lartë krahasuar me të njëjtën periudhë të vitit të kaluar, me një vlerë në rritje prej 11%.
Vitin e kaluar rezerva valutore u rrit ndjeshëm me 17.3%, me kontributin kryesor të dhënë sidomos nga eurobondi prej 650 milionë eurosh i siguruar nga qeveria shqiptare në muajin qershor. Në këtë periudhë, rezerva valutore arriti nivelin më të lartë historik, prej 4.16 miliardë eurosh. Në pjesën dërrmuese, rezerva valutore mbahet në obligacione dhe në depozita, ndërsa një pakicë konsiston në rezerva ari dhe të drejta tërheqjeje (SDR) në Fondin Monetar Ndërkombëtar.
Vitin e kaluar, Banka e Shqipërisë ka përfshirë edhe monedhën kineze dhe atë australiane në valutat e në të cilat mbahet rezerva valutore. Sipas Bankës së Shqipërisë, në fund të vitit 2020 Euro përbënte, 64.9% të rezervës valutore, e ndjekur nga Dollari amerikan me 19% dhe SDR me 5.8%. Qëllimi kryesor i rezervës valutore është mbulimi i nevojave emergjente që mund të ketë ekonomia për valutë të huaj, por, ajo mund të përdoret edhe si instrument rregullues në raste të çrregullimit të kursit të këmbimit ose në funksion të objektivave ligjorë të Bankës së Shqipërisë, për ruajtjen e stabilitetit të çmimeve dhe stabilitetit financiar.
Shembulli i fundit ishte marsi i vitit të kaluar, kur pas shpërthimit të pandemisë monedha vendase pësoi një nënçmim të shpejtë në kursin e këmbimit me euron. Banka e Shqipërisë shiti mbi 20 milionë euro brenda pak ditësh dhe kjo mundësi stabilizim të shpejtë të kursit të këmbimit. Madhësia e rezervës valutore vlerësohet është e kënaqshme në raport me objektivat kryesorë të saj, një nga të cilët është mbulimi i katër muajve importe. Mbështetur në ecurinë e importeve për katër muajt e parë të vitit, rezerva valutore aktualisht do të ishte e mjaftueshme për të mbuluar nëntë muaj importe.
Këtë vit, Banka e Shqipërisë rifilloi edhe programin e ankandeve të blerjes së valutës, në funksion të menaxhimit të rezervës valutore. Për këtë qëllim janë planifikuar 14 ankande, ku në total, shuma e parashikuar për t’u blerë është midis 56 dhe 84 milionë eurove.
Megjithatë, shuma e blerë në ankande mund të jetë edhe më e madhe, sepse në shumicën e rasteve Banka e Shqipërisë ushtron opsionin e blerjes në një raund të dytë, në shuma më të mëdha. Në dy ankandet e zhvilluara në tremujorin e parë të vitit, Banka e Shqipërisë bleu gjithsej 16.1 milionë euro. Shuma e blerë në tremujorin e parë të vitit është më e lartë krahasuar me vitin e kaluar, por më e ulët në krahasim me tremujorin e parë të dy viteve pararendëse. Blerjet e euros me qëllim rritjen e rezervës valutore u rritën ndjeshëm pas vitit 2017 dhe arritën shifrën rekord të gati 155 milionë eurove në vitin 2019.
