Luhatjet e inflacionit kanë sjellë rritje të çmimeve në të gjithë borën, por më së shumti në vendin tonë. Qeveria ka thënë se kjo tendencë do të fillojë të bjerë në vitin e ardhshëm, por Banka Qendrore Evropiane paralajmëron të kundërtën. Përmes një prononcimi për mediet, presidentja e Bankës Qendrore Evropiane, Christine Lagarde, ka treguar se, çmimet do të vijojnë të rriten, e megjithatë rekomandon që politikat monetare të mbeten të pandryshuara. Sakaq, nga ana tjetër ajo këmbëngul që banka nuk duhet të tkurrë politikat monetare, pasi mund të frenojë rimëkëmbjen ekonomike. Sipas saj, politika monetare duhet të jetë e durueshme dhe vigjilente ndaj çdo dinamike të mundshme destabilizuese që mund të shfaqet.
Duke vënë në dukje rritjen e çmimeve të energjisë dhe vonesat e furnizimit, Lagarde tha se ky inflacion është i padëshiruar dhe i dhimbshëm, dhe natyrisht që ka shqetësime mbi kohëzgjatjen. Ajo sugjeron të identifikohen nxitësit kryesorë të inflacionit për ta kuptuar mënyrën se si politika monetare të përgjigjet në rrethanat aktuale.
Lagarde pohoi po ashtu se Banka Qendrore Evropiane po monitoron nga afër zhvillimet dhe synon të sigurojë stabilizimin e inflacionit në një objektiv prej 2 për qind në afat të mesëm. Inflacioni në eurozonë arriti në 4.1 për qind muajin e kaluar, më shumë se dyfishi i objektivit të Bankës Evropiane, duke ndezur diskutimet se banka mund të fillojë të rrisë normat vitin e ardhshëm.
Discussion about this post