Blerja e një banese po bëhet edhe më e vështirë. Jo vetëm prej çmimeve që po rriten me ritme dyshifrore por edhe prej kushteve të reja që po aplikojnë bankat në dhënien e kredive.
Menjëherë pasi hyri në fuqi vendimi i Bankës së Shqipërisë që kufizoi kredidhënien për blerje banese në disa tavane, bankat tregtare kanë raportuar për shtim të refuzimeve të kërkesave për kredi.
“Kufizimet e vendosura në korrik të këtij viti nga Banka e Shqipërisë mbi raportin e kredisë ndaj vlerës së disbursuar dhe mbi raportin e shërbimit të borxhit ndaj të ardhurave në kreditë e reja për pasuritë e paluajtshme, u raportuan nga bankat si faktorë që vepruan në kahun shtrëngues të standardeve të kreditimit”, thuhet në vrojtimin e Bankës së Shqipërisë.
Prej 1 korrikut kur një qytetar kërkon kredi në lekë për të blerë banesën e parë, banka mund të japë deri në 85% të vlerës së pronës, ndërsa për shtëpinë e dytë e në vijim deri në 80%.
Kufizimi tjetër i caktuar nga Banka Qendrore është për këstet mujore të kthimit të kredive. Për huatë në lekë kësti mujor nuk duhet të jetë më shumë se 40% e të ardhurave të kredimarrësit, ndërsa për kredinë e dytë etj, ulet në 35%.
Tavanet janë më të ulta për kreditë në valutë, përkatësisht në 75% dhe 70% të vlerës së pronës në varësi të blerjes nëse është banesë e parë apo e dytë. Kurse këstet janë sa 35% e totalit të të ardhurave të individin për huanë e shtëpisë së parë, dhe 30% kur është kredi për të blerë një pronë të dytë apo më shumë.
Edhe për pjesën e mbetur të vitit standardet e kreditimit për individët priten të shtrëngohen kryesisht për blerje banese, ku krahas kufizimeve të Bankës së Shqipërisë, negativisht po ndikojnë edhe mungesa e kolateralit, aftësisë paguese të kredimarrësve dhe zhvillimeve aktuale e të pritura në tregun e banesave.
Vendimi i Bankës së Shqipërisë për të kufizuar kredinë për blerje banese, erdhi për të mbrojtur bankat nga ekspozimi i lartë që kishin në tregun e pasurive të paluajtshme, si dhe për të zbehur rritjen e çmimit të pronave, pasi Banka gjykon se është nxitur nga rritja e kreditimit. /Report TV
Discussion about this post