Banorët e Laprakës dhe “5 Maji”t kanë dalë sërish në një protestë ditën e sotme, duke këmbëngulur se nuk do lejojnë që banesat e tyre të shemben. Ata kërkojnë nga Bashkia Tiranë të tregohet transparente dhe t’iu jap një zgjidhje.
Ata thanë se në takimin që kishin patur me kryeministrin, ky i fundit vetëm ishte tallur me ta dhe ishte sjellë në mënyrë arrogante. Ndërsa sa i përket numrit të ulët të protestuesve të pranishëm, banorët thanë se shumë prej tyre ishin kërcënuar se do të pushoheshin nga puna nëse do merrnin pjesë në protestë.
“Nuk na ka dhënë zgjidhje, aty në TV na thonë ndryshe se do marrim 100% metër për metër por mbeten vetëm fjalë pa u firmosur askund. Ai thjesht na i jep në televizor por jo në realitet me kontratë ekzistuese”, u shpreh një banorë.
Ndërsa një tjetër tregoi se disa prej tyre nuk dalin më në protestë, pasi iu bëjnë presion për largime nga puna. Sipas tij, qeveria vetëm se po tallet me ta dhe po i lë në mëshirë të fatit. “Komunikimi i kryeministrit ka qenë nul fare atë ditë se nuk u ka dhënë asnjë lloj përgjigje banorëve. Ai ka përdorur një gjuhë arrogante ndaj banorëve, vetëm është tallur me ne. Në numra jemi pak sepse kanë hyrë ata patronazhistët mes nesh dhe presione në shtëpi. Kush është në punë, nuk guxon me ardh këtu. Pra nga presioni i bërë këtu nuk janë shumë veta në protestë”, tha një banorë.
Gjithsesi ata shprehen se do të përshkallëzojnë protesta dhe nuk do të dorëzohen derisa të dalë e drejta dhe të marrin atë që në të vërtet meritojnë.
Discussion about this post