Banorët e “5 Majit” kërcënojnë: Do mbrojmë pronat me armë

Banorët e  zonës “5 Maji” në Tiranë kanë dalë sërish në protestë, ndërsa paralajmërojnë se do të ketë përshkallëzime. Madje një prej tyre ka thënë se do të pajisen me armë për t’u përplasur me policët apo fadromat që afrohen në shtëpitë e tyre. Ditën e sotme, tre banesa, që kishin arritur marrëveshje me Bashkinë në lagjen ‘5 MajI’ në Tiranë janë shembur, por banorët sërish kanë bërë rezistencë dhe sipas tyre, ata do ti mbrojnë me gjak e me forcë shtëpitë e tyre.  Një prej tyre shprehet se është me dokumente të rregullta dhe qeveria nuk ka marrë fare në konsideratë fjalën dhe kërkesën e tij

“Kam 35 vite si banor i lagjes, jemi me dokumente e të gjitha. Na ka ardhur një shkresë që do prishte si këto 3 shtëpi këtu. E kemi hedh në gjyq dhe kemi bërë kërkesë sepse nuk jemi dakord. Nuk ka asgjë të pasqyruar dhe konkrete. U bëj thirrje policisë, bashkisë të vijnë të na japin një llogari, ku do shkoj si do veprohet”, tha ai.

Më tutje, një tjetër banorë tha se tashmë nuk do të ketë më protesta paqësore, por të jetë nevoja ata do derdhin gjak, duke qenë se në rrugë ligjore nuk e fituan dot të drejtën e tyre.

“Ne u përpoqëm me anë ligjore. Na sollën letër që të lirojmë shtëpinë. Se ku do të shkoj me gjithë kalamajtë nuk e di. Nëse vinë të na shembin shtëpitë me forcë me policinë, nuk e dimë si do reagojmë. Po më erdhën në shtëpi situata do bëhet keq. S’më plas fare! Do e marr personale me këdo që vjen dhe më cenon privatësinë. I bëj thirrje Ambasadës amerikane që të shohin këto monstra që vijnë të na marrin shtëpitë. Të vijë dhe serbi ne nuk i nxjerrim fëmijët nga shtëpia, nuk ikim. Do blemë kallash, hekur e gurë, në atë moment unë do e mbroj. Na sillni kontratën te cili pallat do marr hyrjen dhe kaq, sepse ato që kanë sjellë janë qesharake”, u shpreh ai mes lotësh, duke thënë se pas shtëpisë nuk ka më se çfarë të humbasë.

Protestat në lagjen ‘5 maji’ nuk kanë ndalur prej afro dy muajsh dhe banorët janë shprehur se nuk janë kundër projektit të zhvillimit por jo duke mos rënë në dakordësi me to. Kërkesa e tyre e vetme është të kenë kontratë të qartë për hyrjen ose shtëpinë që do marrin as shembjes, dhe për aq kohë sa Bashkia nuk e ofron një gjë të tillë ata do vijojnë me rezistencën.