Banorët e lagjes “5 Maji” në kryeqytet po protestojnë sërish ditën e sotme kundër aksionit të IKMT-së për prishjen e banesave të tyre.
Në një prononcim për mediat, banorët deklaruan se do i mbrojnë me jetë pronat dhe nëse nuk iu jepen hapësira ligjore, do e zgjidhin me dhunë.
“Në proces legalizimi jemi të gjithë, nëse vijnë këtu, vijnë për të gjithë. Më i keq se Enveri s’ka qenë askush, por kjo diktaturë ia kalon edhe atij. Me jetë po është e nevojshme do rrimë këtu. Ti më heq të drejtën e ankimimit në gjykatë kur ti nuk më njofton paraprakisht. Në 2013 PS i bllokoi legalizimet dhe të gjithë ata që janë në proces kanë vetëm një certifikatë pronësie për të marrë. Në çdo fazë këta i marrin nga 20-30 familje në mënyrë që të mos ngrihen të gjithë banorët. Në momentin që bëj ankesë ndaj bashkisë, ajo procedurë ka marrë fund, ne nuk kemi shkallë të shkojmë te Zoti, dy rrugë janë: me ligj ose me dhunë dhe nëse këta nuk na japin hapësira ligjore, do i mbrojmë pronat me jetë”- u shpreh njëri nga banorët.
Banorët e kësaj zone po protestojnë prej disa ditësh, duke akuzuar qeverinë se po iu cenon të drejtën e pronës, ndërsa bashkia Tiranë ende nuk ka dale më një reagim zyrtar për të informuar qytetarët si do veprohet më tej.
