Si çdo të dielë banorët e Bërxullës që preken nga projekti Thumanë-Kashar kanë dalë sërish në protestë, duke kërkuar që të mos u prishen banesat e tyre, ose ata të dëmshpërblehen sipas tregut.
Të revoltuar, ata u kanë bërë thirrje institucioneve që të ulën dhe të dialogojnë. Sipas tyre, shteti po u shkatërron banesat, ndërsa shprehen te vendosur se nuk do të dorëzohen.
Banorët u solidarizuan edhe me banorët e prekur nga tërmeti në Turqi dhe Siri, por u shprehen se aty fatkeqësia ishte natyrore, ndërsa në Shqipëri e fatkeqësitë i bën shteti.
“Na bëri armik kreu i qeverisë edhe me Amerikën. Ne presim, por durimi do të soset dhe ne nuk do të presim. Njeriu njëherë lind dhe njëherë vdes. Prona është e shenjtë”, tha një banor i zonës.
“Po protestojmë mbi 4 muaj e gjysmë. Ne si cdo të dielë jemi në protestë, por sot solidarizohemi me popullin turk dhe sirian. Çfarë ka ikur nuk kthehet më. Dyert tona janë të hapura. Ndaj ndajmë dhimbjen dhe i bashkohemi këtij populli që vuan. Por ajo dhimbje ishte nga fatkeqësia natyrore. Këtu në Shqipëri fatkeqësitë natyrore po i shkaktojnë politikanët. I bëjmë thirrje që mos shkaktojnë fatkeqësi. Ne nuk tërhiqemi sepse pronat nuk i kemi të vjedhura siç i keni ju. Boll keni vjedhur. Nuk jeni të ngopur me këto fshatrat turistik? Jo të vidhni pronën e fshatit Bërxullë për të bërë vila për shoqet dhe të dashurat e politikanë, siç po dalin një nga një”, tha banori tjetër.
Aty ku kanë ndërtuar kanë përdorur mashtrim, noterë e sekserë. Në Bërxullë nuk kanë shanse. Ose të na vrasin ose ne nuk tërhiqemi kurrë”, ka deklaruara njëri prej banorëve.
Discussion about this post