Banorët e Bërxullës rinisin protestën përpara Hipotekës

Banorët e Bërxullës janë ngritur sërish në protestë në shenjë kundërshtie për projektin për ndërtimin e rrugës Thumanë-Kashar.

Të vendosur para zyrave të Hipotekës, banorët kërkuan informacion mbi gjendjen e pronave të tyre, dhe banesave, ndërsa kërkojnë që të legalizohen sipas ligjit.

“Ku është ligji? E ka përcaktuar qartë që të gjithë ndërtimet informale deri në 2006 duhet të legalizohen. Deri në 2022-shin, nuk ka pasur asnjë projekt për këtë zonë. Sot del projekti dhe thotë; nuk certifikohen pronat dhe banesat.

S’kemi asnjë lloj përgjigje, asnjë informacion dhe nuk kemi asnjë projekt të rrugës. Nuk i jepet asnjë zgjidhje atij ngërçi. Kjo rrugë në këtë njësi është e vështirë që të zhvillohet, pasi nuk i jepet akses banorëve për rrugë dytësore, as për mbikalime apo nënkalime, apo se si linjat e interkonjeksionit janë për t’u lëvizur.

Institucionet nuk janë në gjendje të japin përgjigje, dhe këtu po bëhet masakër e madhe. Na jepni një sqarim mbi këto paligjshmëri. Projekti është bërë në Itali me google, pa i ditur terreni”, tha një prej banorëve.