Mungesa e transportit publik është një ndër problemet që po hasen më shumë nga banorët kryesisht të zonave të thella. Banorët e Dropullit të Sipërm janë ngritur në protestë për mungesën e transportit publik në fshatrat e thella të kësaj njësie vendore në drejtim të destinacioneve të tjera.
Në këtë zonë nuk funksionon asnjë linjë publike, ndaj taksitë janë e vetmja alternativë.
Një ndër problemet më të mëdha që sjell kjo mungesë transporti janë dhe rastet ku personat mund të sëmuren.
“Mua më shqetëson jashtë mase sepse në familjen time veç gruas kam edhe vjehrrën 87 vjeç, në momente të caktuara ka nevojë për shërbim mjekësor. Ne nuk mundemi dot ta zgjidhim shërbimin mjekësor. Derisa të vijë shërbimi mjekësor nga Gjirokastra njerëzit kanë vdekur”, ka thënë një banor.
Të mbledhur në fshatin Vrisera për të protestuar banorët akuzuan Bashkinë e Dropullit për këtë anomali dhe vuajtje që u shkakton mungesa e transportit urban.
“Dikush duhet të japë përgjigje, pse pas 30 viteve nuk kemi makinë?”
Kreu i Bashkise Dropull, Dhimiter Toli pranon problemin por thotë se nuk ka asnjë zgjidhje: Ka një problem me të gjithë Dropullin me linjat e autobusëve, por problemi nuk lind nga kryetari, por lind nga dy firma që kanë hedhur në gjyq njëra-tjetrën.”
Discussion about this post