Valbona Kola ka vetëm një vit si kryebashkiake në Klos, por në këtë periudhë ku qytetarët prisnin që ajo të mbajë premtimet, shënohen vetëm për abuzime me tenderat. Gijotina.com ka raportuar shkelje me disa tendera të bashkisë Klos, përfshirë edhe fondet e rikonstruksionit të shkollave.
Tani përpjekja bëhet për paratë e një kanali uji. Konkretisht për tenderin me objekt “Ndërtim kanali ujitës Fullqet, Klos”, me fond limit mbi 490 milionë lekë që pritej të mbyllej më datë 30 gusht 2024.
Nuk e kuptojmë përse Kola investon në një kanal vaditës tani që kanë nisur shirat, kur punimet mund të kryheshin më herët. Në fakt, kjo po ndodh në shumë bashki, ku shkollat riparohen kur nxënësit janë shkollë, apo kryhen asfaltime në mes të shirave. Duket haptazi se shqetësimi i drejtuesve janë prokurimi i fondeve, jo zbatimi me cilësi i projekteve. Edhe kryetarja Kola e ka syrin tek 490 milionë lekët.
Sipas dokumentit, kontrata do të nënshkruhej më 30 gusht 2024 dhe do të zgjasë 6 muaj. Nëse punët shkojnë mirë, kanali vaditës do të jetë gati para zgjedhjeve.
Por procedura e prokurimit është e dyshimtë dhe nuk jep garanci se do të ketë punime sipas kushteve të kontratës.
Vendimi i komisionit të Valbona Kolës ka ngjallur pakënaqësi tek pjesëmarrësit. Kështu, Arben Çela, pronari të firmës UDHA shpk. ka bërë një denoncim.
Në datën 16 shtator 2024, nëpërmjet Sistemit të Ankesave Elektronike pranë Komisionit të Prokurimit Publik, është administruar ankesa e operatorit ekonomik “Udha” SHPK.
Nga shqyrtimi paraprak i ankesës të sipërcituar, u konstatua se objekti i ankesës lidhet me vendimmarrjen e Komisionit të Vlerësimit të Ofertave mbi skualifikimin e ofertës të paraqitur nga operatori ekonomik “Udha” SHPK.
Deri në këtë moment, tenderi është i pezulluar.
Sipas të dhënave të dokumentit, UDHA SHPK është skualifikuar se nuk ka dorëzuar dokumentet që vërtetojnë se përmbush kapacitet teknike për të zhvilluar brenda afateve këtë projekt. Mirëpo ankimuesi këmbëngul se ai i plotëson kapacitetet.
Dërgimi i tenderit tek KPP mund të jetë një manovër e bashkisë dhe e biznesmenit që nuk plotëson kriteret, për ta çuar vendimmarrjen në Tiranë ku mund të sajohet ndonjë “rregullim kriteresh” apo “anulim i procedurës”. Dhe më pas Kola t’i ketë duart e lira për t’a firmosur kalimin e fondit. Theksojmë se paratë për këtë investim u përkasin viteve buxhetore 2024, 2025 dhe 2026. Ndërkohë, kanali ka marrë edhe para të tjera që janë planifikuar me urgjencë duke ndryshuar buxhetin në prill 2024 për oponencën teknike, supervizionin, kolaudimin dhe studimin e ndikimit në mjedis. Sipas tabelës së mëposhtme del që Kola ka firmosur dërgimin e fondit rezervë për këtë projekt.
“Udha” shpk është një subjekt që ka marrë gjithmonë tendera pa garë, më së shumti nga ARRSH, Bashkia Kamëz dhe Bashkia Tiranë.
Përmendim këtu, që kjo firmë ka marrë fonde edhe në “Rrugën e Arbrit”, punimet në të cilën nuk i bëri siç kërkonte kontrata.
Bëhet fjalë për tenderin me vlerë 120 milionë lekë dhe objekt “Rehabilitim i tombino/tubosider në aksin rrugor Qafa e Buall-Fillimi i Rrugës së Arbrit”. Ky tender konsiderohet si prokurim i një pune për të cilën është paguar një herë një kompani tjetër. Për rregullimet në këtë rrugë merr pagesa të rregullta firma “Gjoka Konstruksion”. që e ka detyrim si koncesionar.
Të shohim se çfarë do të vendosë kryetari i KPP, Jonaid Myzyri për ankesën e Arben Çelës dhe vendimin e Kolës së Bashkisë Klos. Ndërkohë banorët e zonës Fullqet, Klos, mund të presin për ndërtimin e kanalit, sepse kështu kanë bërë për vite me radhë që dëgjojnë premtime.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post