Banorët e Kodër-Babrrusë në Tiranë kanë dalë sot në protestë ku kundërshtojnë ngritjen e fabrikës së municioneve që do të ndërtojë KAYO, duke denoncuar publikisht se do u prishen banesat dhe se po i largojnë me forcë.
Teksa paralajmërojnë përshkallëzim të protestave, ata apelojnë që kjo iniciativë e qeverisë të ndalojë deri në shprehjen e Gjykatës. Banorët thonë se kanë bërë denoncime dhe janë në proces, por tashmë shteti ka nisur që të zbatojë një vendim të paligjshëm, duke mos i dëgjuar zërat e tyre.
Banorët thonë se po u rrezikohet jeta dhe pasuria, teksa mund të mbeten edhe rrugëve. Ata akuzojnë drejtorin Ardi Veliu, qeverinë dhe zv/kryeministren Belinda Balluku, që ka deleguar edhe firmën për këtë investim.
“Jemi pronarë legjitime të kësaj pasurie. Ku do shkojmë ne, po na dëbojnë. Po na zaptojnë tokat. Si mund të bësh fabrikë armësh e municionesh këtu, ja shtëpitë ku janë. Do ndërtojnë fabrikë municionesh në Kodër Babrru”, thotë një prej banorëve, që shpjegon se kanë bërë jo vetëm shkresa, por edhe denoncime.
Më tej ai tregon edhe kalvarin e ankesave nga një institucion në tjetrin.
“Kemi bërë shkresa, jemi ankuar, kemi pyetur edhe në kadastër. Na thanë kemi urdhër, se këto prona do afishohen dhe do dalin për Ministrinë e Mbrojtjes. Kjo është vjedhje ashiqare. Vijnë të shkatërrojnë komunitetin, se ke pushtetin. Na i kanë marrë pronat që në kohën e Enver Hoxhës dhe tani do na bëjnë fabrikë municionesh, teksa kjo është prona jonë. Po shkatërrohen banorët, pas kësaj janë kryeministri dhe Ardi Veliu. Ne nuk i ndahemi kësaj pune, derisa të flasë gjykata”, vijon ai.
Më tej banori shprehet se nuk do dorëzohen dhe do përshkallëzojnë protestat:
“Jam i vendosur që edhe kjo punë të mos ndodhë për komunitetin, të vdesi komuniteti dhe të pasurohem unë. Unë jetoj në këtë komunitet, jo të vdesin këta e të pasurohem unë, kurse ata të vijnë me polici dhe ushtri dhe të vrasin komunitetin, nuk shkon kjo punë. Na kanë thënë se do jeni palë në Gjykatë”.
Ai nënvizon se përgjegjëse për situatën është edhe zv/kryeministrja Belinda Balluku, që edhe pse nën hetim dhe e pandehur për abuzim me tenderët, ka deleguar firmën për këtë fabrikë municionesh.
“Me delegim Belinda Balluku, vjen shkresa nga Ministria e Mbrojtjes nga sekretari i përgjithshëm se kjo pronë i kalonte kompanisë KAYO. Si ka mundësi, ajo është nën hetim e pandehur, ndërkohë që bën firmë me delegim për pronën këtu. Isha edhe në polici për denoncim ndaj firmës KAYO, te Komisariari dhe nuk pranuan, më thanë se ishte bërë denoncomi e kallëzimi më parë e nuk mund të bëhej më”, tha ai.
Në fund i bëri edhe apel drejtorit të policisë dhe qeverisë që të marrin masa konkrete dhe ta ndalojnë këtë fabrikë. Ai thotë se duhet pritur të shprehet gjykata.
“Kam dhe një thirrje për Drejtorin e Përgjithshëm të Policisë së Shtetit, merr masa. Ta lëmë drejtësinë të flasë, ne nuk kemi kompetenca, nuk ka as Rama as ministri, të flasë drejtësia. I kemi bërë me vështirësi këto shtëpi, me kursimet e fëmijëve në emigracion dhe sot të vish e t’i prishësh, kjo nuk shkon. Ky është vetëm fillimi, do lajmërohen të gjithë”, përfundon banori.
Discussion about this post