Varfëria është ulur këmbëkryq në qytetin e Kuçovës, ku çdo familje është në kufijtë e mbijetesës. Sikur të mos mjaftonte rritja e çmimit të bukës një muaj më parë, javët e fundit kanë njohur rritje edhe çmimet e produkteve të shportës si dhe çmimet e fruta-perimeve.
Nga një vëzhgim i bërë në shumë lagje të qytetit të Kuçovës, është vënë se banorët marrin edhe ushqime “me listë” në dyqanet ushqimore apo marketet e lagjeve. Me të ardhurat e pakta që kanë, shumica e tyre vetëm me pension apo përkrahje sociale, familjarët kuçovare kanë gjetur një mënyrë për të mbijetuar me veresi, edhe pse gjithmonë të zhytur në borxhe.
Varfëria e tejskajshme po dëmton në këtë mënyrë edhe bizneset që tashmë nuk po nxjerrin dot asnjë fitim nga dyqanet e tyre ushqimore, ku listat e borxheve janë të pafund. Edhe pse tmerrohen nga kamerat, tregtarët nuk ngurojnë të tregojnë jashtë tyre se listat ushqimore që kanë banorët varijojnë nga 20-40 mijë lekë (të reja).Vetë banorët e Kuçovës shprehen se, gjendja e tyre ekonomike është tejet e vështirë dhe se ata e kanë të pamundur të përballojnë jetesën me pensionet, rrogat apo përkrahjen sociale që marrin.
Sipas banorëve, kjo situatë i ka detyruar ata të marrin ushqime me lista sepse-siç shprehen vetë ata-nuk mund ti lënë dot fëmijët pa ngrënë. Banorët pohojnë se çdo gjë është rritur, që nga çmimi i vajit, vezëve, djathit e perimeve, ndërkohë që “turpi” më i madh-sipas tyre-ishte rritja e çmimit të bukës. Është për të ardhur keq kur dëgjon të flasin për vaktet e tyre ushqimore të përditshme, ndërkohë që kur i pyet nëse e blejnë dot mishin apo jo të gjithë zgurdullojnë sytë, pasi çmimi i mishit ka shkuar 10 mijë lekë për kg.
