Banorët e Laprakës kanë vijuar protestën edhe gjatë pasdites së të hënës ku janë mbledhur përpara Kryeministrisë.
Gjatë gjithë këtyre ditëve ata kanë protestuar në zonën ku banojnë, për shkak të projektit të Unazës së Madhe. Banorët pohojnë se nuk janë kundra zhvillimit, por kërkojnë që të marrin dëmshpërblim të plotë për banesat të cilat do të shemben. Ende nuk dihet se si do të procedohet me dëmshpërblimet e banorëve, por kjo gjë i ka detyruar këta të fundit të bllokojnë rrugën kryesore çdo pasdite ku kanë protestuar përreth 60 minuta.
“Ne kërkojmë dëmshpërblim të plotë. Ne jemi pro projektit, por duam që të trajtohemi njësoj si ata që janë në pushtet, edhe ne që jemi pa pushtet”, kanë pohuar banorët.
Gjithashtu ata kanë përmendur dhe opozitën, për të cilët kanë pakënaqësi pasi nuk ka pasur asnjë reagim prej tyre. Sipas banorëve, bëhet fjalë për 2000 banorë të cilët do të mbeten në qiell të hapur, pikërisht si pasojë e këtij projekti.
Pak ditë më parë, banorët premtuan se protestat do të vazhdojnë deri sa të vendoset diçka për fatin e tyre. Gjithashtu pohuan se do të mblidheshin përpara kryeministrisë, ashtu siç bënë, por pritet që në ditët në vijim t’i drejtohen edhe bashkisë.
