Uji i pijshëm, mbetet një hall i cili nuk po gjen zgjidhje për gati dy dekada për banorët e Njësisë Rrethina në Shkodër. Bashkia Shkodër nisi dy vite më parë ndërtimin e një ujësjellësi të ri, por punimet po zvarriten dhe janë shtyrë më të paktën një vit.
Jo vetëm në verë, por edhe gjatë vjeshtë – dimrit fshatrat e njësisë administrative Rrethina në Shkodër vuajnë mungesën e ujit të pijshëm. Banorët atje janë të detyruar që të udhëtojnë me kilometra larg shtëpive të tyre, për sigurimin e ujit të pijshëm, ose në të kundërt ta blejnë atë. Banorët shprehen se janë harruar nga bashkia dhe strukturat e tjera shtetërore, megjithëse premtimet i kanë pasur të shumta, që ky problem të zgjidhje.
Pak ditë më parë kryeministri i vendit Edi Rama foli për një reformë të thellë dhe kritikoi këto ndërmarrje për mënyrën e menaxhimit. Por se sa do t’i dilet sfidës për të siguruar ujë 24-orë për këto familje, do të mbetet të shihet në vitet e ardhshme. Për vitin 2021-shin beteja është humbur edhe në qarkun e Shkodrës.
Discussion about this post